Indigo: మహిళల కోసం ఇండిగో కొత్త సదుపాయం

బస్సుల్లో సీట్‌ రిజర్వ్‌ చేసుకునేప్పుడు, ఒంటరి మహిళ పక్క సీట్‌ మరో మహిళకు మాత్రమే రిజర్వ్‌ అవుతోంది. ఇప్పుడు విమానయాన సంస్థ ఇండిగో కూడా ఈ తరహా సదుపాయాన్ని అందుబాటులోకి తెచ్చింది. ఒంటరిగా వెళ్తున్న మహిళ.. విమానంలో సీట్‌ రిజర్వ్‌ చేసుకునేందుకు, మరో మహిళ పక్క సీటు ఎంచుకునే వీలును ఇది కల్పించనుంది. అప్పటికే రిజర్వ్‌ చేసుకున్న ఇతర మహిళా ప్రయాణికుల సీట్ల గురించి, వెబ్‌ చెక్‌-ఇన్‌ సమయంలో మహిళలు తెలుసుకునే ఏర్పాటు చేసినట్లు సంస్థ బుధవారం వెల్లడించింది. మహిళా ప్రయాణికులకు మరింత సౌకర్యవంత ప్రయాణ అనుభవాన్ని అందించేందుకు ఈ సదుపాయాన్ని అమల్లోకి తెచ్చినట్లు వివరించింది. ‘ప్రస్తుతం ఇది ప్రయోగాత్మక దశలో ఉంది. మహిళల వెబ్‌చెక్‌ ఇన్‌ సమయంలో మాత్రమే అప్పటికే బుక్‌ చేసుకున్న మహిళల సీట్లు కనిపిస్తాయి. కుటుంబసభ్యులతో కలిసి వెళ్లే మహిళలతో పాటు, ఒంటరిగా ప్రయాణించే మహిళల సీట్లూ ఉంటాయ’ని తెలిపింది.