IndiGo: ‘పక్క సీటు ఎవరిదో తెలుసుకోవచ్చు..’ మహిళల కోసం ఇండిగో ప్రత్యేక ఫీచర్‌

ఇంటర్నెట్‌ డెస్క్‌: మహిళలకు సౌకర్యవంతమైన ప్రయాణాన్ని అందించేందుకు ప్రముఖ దేశీయ విమానయాన సంస్థ ఇండిగో (IndiGo) సరికొత్త సదుపాయాన్ని ప్రారంభించింది. విమానంలో మహిళలు ఎక్కడెక్కడ సీట్లు బుక్‌ చేసుకున్నారో తెలియజేసేలా కొత్త ఫీచర్‌ను అందుబాటులోకి తెచ్చింది. దీంతో, ఇకపై మహిళలు వెబ్‌ చెక్‌-ఇన్‌ సమయంలో ఇతర మహిళా ప్రయాణికులు (Female Passengers) బుక్‌ చేసుకున్న సీట్లు ఏంటో చూడొచ్చు. వాటిని బట్టి తమ సీట్లను ఎంచుకునే వెసులుబాటు ఉంటుంది.

‘‘ఈ ఫీచర్‌తో వెబ్‌ చెక్‌-ఇన్‌ సమయంలో మాత్రమే మహిళా ప్రయాణికులు బుక్‌ చేసుకున్న సీట్ల (Flight seats Booking)ను చూడొచ్చు. ఒంటరిగా ప్రయాణించే మహిళలతో పాటు ఫ్యామిలీ బుకింగ్స్‌కు కూడా ఇది వర్తిస్తుంది. ప్రస్తుతానికి పైలట్‌ మోడ్‌లో దీన్ని అందుబాటులోకి తెచ్చాం. ఈ ఆప్షన్‌ తీసుకురావడానికి ముందు మార్కెట్ రీసెర్చ్‌ చేశాం. మహిళలకు సౌకర్యవంతమైన, భద్రమైన ప్రయాణ అనుభవాన్ని అందించడమే మా లక్ష్యం’’ అని ఇండిగో తమ ప్రకటనలో వెల్లడించింది.

రియల్‌ ఎస్టేట్‌ మోసాలకు సెలబ్రిటీలూ బాధితులే.. రెరా నిబంధనలు ఏం చెప్తున్నాయ్‌?

రూ.1199తో స్పెషల్‌ సేల్‌..

దీంతో పాటు తమ దేశీయ అంతర్జాతీయ విమానాల్లో ఇండిగో ప్రత్యేక సేల్‌ను ప్రకటించింది. ఇందులో టికెట్‌ ధరలు రూ.1199 నుంచే టికెట్‌ ధరలు ప్రారంభం కానున్నాయి. నేటి (మే 29) నుంచి మే 31వ తేదీ వరకు ఈ సేల్‌ అందుబాటులో ఉండనుంది. జులై 1 నుంచి సెప్టెంబరు 30 మధ్య ప్రయాణాల బుకింగ్‌కు వర్తిస్తుంది. అంతేగాక, కస్టమర్లు కోరుకున్న సీట్లకు విధించే ఛార్జీలపై 20శాతం వరకు డిస్కౌంట్‌ కూడా పొందొచ్చని విమానయాన సంస్థ వెల్లడించింది.