iPhone 17 Pro Max: నారింజ రంగు ఐఫోన్‌ 17ప్రో మ్యాక్స్‌ దొరకట్లేదు

దిల్లీ: ప్రస్తుతం ఐఫోన్‌ 17 శ్రేణికి ముందస్తు బుకింగ్‌ జరుగుతోంది. ఈనెల 19 నుంచి వీటిని డెలివరీ ఇవ్వనున్నారు. వీటిల్లో నారింజ (కాస్మిక్‌ ఆరెంజ్‌) రంగుతో యాపిల్‌ తీసుకొచ్చిన ఐఫోన్‌ 17 ప్రో మ్యాక్స్‌కు భారీ స్పందన వస్తోంది. భారత్, అమెరికాల్లో ముందస్తు బుకింగ్‌లను ప్రారంభించిన మూడు రోజుల్లోనే, ఐఫోన్‌ 17 ప్రో మ్యాక్స్‌కు మాత్రం ఆర్డర్లు తీసుకోవడం ఆపేశారు. భారత్‌లో యాపిల్‌ స్టోర్లలో పికప్‌ చేసుకునే సదుపాయంతో కాస్మిక్‌ ఆరెంజ్‌ రంగులోని ఐఫోన్‌ ప్రో మ్యాక్స్, ఐఫోన్‌ ప్రో సిరీస్‌కూ ఆర్డర్లు తీసుకోవడం లేదు. భారీ సంఖ్యలో ముందస్తు ఆర్డర్లు రావడమే ఇందుకు కారణమని యాపిల్‌ అధికారి ఒకరు తెలిపారు. కొన్ని స్టోర్లలో డీప్‌ బ్లూ రంగు వేరియంట్‌కు ఆర్డరు తీసుకుంటున్నారు. యాపిల్‌ ఐఫోన్‌ 17 సిరీస్‌ను రూ.82,900- 2,29,900 ధరల శ్రేణిలో విడుదల చేసింది. ముందస్తు బుకింగ్‌ చేసుకున్నవారికి సెప్టెంబరు 19 నుంచి కంపెనీ ఫోన్లను అందించనుంది.