LIC public notice: ‘మా పేరుతో తప్పుడు ప్రచారం’.. ప్రజలకు ఎల్‌ఐసీ అలర్ట్‌!

LIC | దిల్లీ: ప్రభుత్వ రంగానికి చెందిన జీవిత బీమా సంస్థ ఎల్‌ఐసీ (LIC) బుధవారం పబ్లిక్‌ నోటీసు జారీ చేసింది. ఎల్‌ఐసీతో పాటు, సంస్థకు చెందిన వ్యక్తుల పేరుతో వివిధ సామజిక మాధ్యమ ఖాతాల్లో మోసపూరిత ప్రకటనలు వస్తున్నట్లు తమ దృష్టికి వచ్చిందని పేర్కొంది. ఇలాంటి ప్రకటనలపై ప్రజలు, పాలసీదారులు అప్రమత్తంగా ఉండాలని సూచిస్తూ ఎక్స్‌లో ఓ పోస్ట్ పెట్టింది.

‘‘కొంతమంది వ్యక్తులు/ సంస్థలు మా సంస్థ పేరుతో వివిధ సోషల్‌మీడియా వేదికల్లో మోసపూరిత ప్రకటనలు ఇస్తున్నట్లు మా దృష్టికి వచ్చింది. అనధికారికంగా ఎల్‌ఐసీకి చెందిన సీనియర్‌ అధికారులు, మాజీ ఉద్యోగుల చిత్రాలు, బ్రాండ్‌ నేమ్‌, లోగోను వినియోగిస్తున్నట్లు తెలిసింది. ఇలాంటి మోసపూరిత కార్యకలాపాలతో అప్రమత్తంగా ఉండాలని ప్రజలకు, పాలసీదారులకు సూచిస్తున్నాం’’ అని ఎల్‌ఐసీ తన పబ్లిక్‌ నోటీసులో పేర్కొంది. ఈతరహా ప్రకటనలను గుర్తిస్తే వెంటనే ఎల్‌ఐసీ అధికారిక సామాజిక మాధ్యమ ఖాతాల ద్వారా యూఆర్‌ఎల్స్‌ పంపాలని సూచించింది. అలాంటివారిపై చట్టపరంగా చర్యలు తీసుకుంటామని తెలిపింది. అధీకృత సమాచారం కోసం నేరుగా తమనే సంప్రదించాలని సూచించింది.