LIC Q4 results: ఎల్‌ఐసీ లాభం రూ.13,763 కోట్లు.. ఒక్కో షేరుపై ₹6 డివిడెండ్‌

LIC Q4 results | దిల్లీ: ప్రభుత్వరంగ జీవిత బీమా సంస్థ ఎల్‌ఐసీ త్రైమాసిక ఫలితాలను (LIC Q4 results) ప్రకటించింది. మార్చితో ముగిసిన త్రైమాసికంలో ఈ సంస్థ రూ.13,763 కోట్ల నికర లాభాన్ని ఆర్జించింది. గతేడాది ఇదే త్రైమాసికంలో రూ.13,428 కోట్లతో పోలిస్తే నికర లాభంలో 2 శాతం వృద్ధి నమోదైంది. మొత్తం ఆదాయం సైతం రూ.2,00,185 కోట్ల నుంచి రూ.2,50,923 కోట్లకు పెరిగినట్లు ఎల్‌ఐసీ తన రెగ్యులేటరీ ఫైలింగ్‌లో తెలిపింది.

సమీక్షా త్రైమాసికంలో తొలి ఏడాది ప్రీమియం వసూళ్లు రూ.13,810 కోట్లుగా నమోదయ్యాయి. గతేడాది ఇదే సమయంలో ఈ మొత్తం రూ.12,811 కోట్లుగా ఉంది. రెన్యువల్‌ ప్రీమియంల ద్వారా వచ్చే ఆదాయం రూ.76,009 కోట్ల నుంచి రూ.77,368 కోట్లకు పెరిగింది. 2023-24 పూర్తి ఆర్థిక సంవత్సరానికి ఎల్‌ఐసీ 40,676 కోట్ల నికర లాభాన్ని ఆర్జించింది. తుది డివిడెండ్‌ కింద ఒక్కో షేరుకు రూ.6 చొప్పున ఇచ్చేందుకు కంపెనీ బోర్డు నిర్ణయించింది.