Commercial partnership: వాణిజ్య భాగస్వామ్యాల్లో లోటే ఎక్కువ

దిల్లీ: మన దేశం నుంచి వివిధ దేశాలకు ఎగుమతులు, అక్కడి నుంచి దిగుమతులు జరుగుతుంటాయి. మన ఎగుమతుల బిల్లు కంటే, దిగుమతుల బిల్లు అధికంగా ఉంటే, మన దేశానికి వాణిజ్య లోటుగా పరిగణించాలి. అదే మన ఎగుమతులు అధికంగా ఉండి, దిగుమతులు తక్కువగా ఉంటే, మనకు వాణిజ్య మిగులు లభించినట్లు. మనదేశంతో వాణిజ్య లావాదేవీలు అధికంగా నెరపే 10 దేశాలతో చూసుకుంటే, తొమ్మిది దేశాలతో మన దేశానికి వాణిజ్య లోటు నమోదవుతోంది. గత ఆర్థిక సంవత్సరం (2023-24)లో అమెరికా-భారత్‌ మధ్య 118.28 బిలియన్‌ డాలర్ల ద్వైపాక్షిక వాణిజ్యం నమోదు కాగా, మనకు వాణిజ్య మిగులు 36.74 బిలియన్‌ డాలర్లుగా ఉండటం గమనార్హం. చైనా, రష్యా, సింగపూర్, కొరియా సహా 9 దేశాలతో మనకు వాణిజ్య లోటే నమోదైంది. 2022-23తో పోలిస్తే చైనా, రష్యా, కొరియా, హాంకాంగ్‌లతో మనకు వాణిజ్య లోటు పెరిగింది. యూఏఈ, సౌదీ అరేబియా, ఇండోనేషియా, ఇరాక్‌లతో వాణిజ్య లోటు తగ్గింది. ః 2023-24లో మన దేశానికి అతి పెద్ద వాణిజ్య భాగస్వామిగా చైనా కొనసాగింది. ఇరు దేశాల మధ్య ద్వైపాక్షిక 118.4 బి.డాలర్లుగా నమోదైంది. తర్వాత స్థానంలో అమెరికా నిలిచింది. 2021-22, 2022-23 ఆర్థిక సంవత్సరాల్లో ద్వైపాక్షిక వాణిజ్యంలో అమెరికా అగ్ర స్థానంలో ఉండేది. యూకే, బెల్జియం, ఇటలీ, ఫ్రాన్స్, బంగ్లాదేశ్‌లతో కూడా మన దేశానికి వాణిజ్య మిగులు ఉంది.