Treaty of Russia: మన దేశంలో ఎస్‌జే-100 విమానాల తయారీ

హెచ్‌ఏఎల్‌తో రష్యా ఒప్పందం

దిల్లీ: మనదేశంలోనూ ప్రయాణికుల విమానాలు తయారీ చేయాలన్న ఆకాంక్ష నెరవేరేందుకు మార్గం సుగమం అయ్యింది. తక్కువ దూరం ప్రయాణాలకు ఉపయోగపడే, 2 ఇంజిన్ల న్యారోబాడీ ఎస్‌జే-100 విమానాలను తయారు చేసే రష్యా కంపెనీ యునైటెడ్‌ ఎయిర్‌క్రాఫ్ట్‌ కార్పొరేషన్‌ (పీజేఎస్‌సీ-యూఏసీ)తో మన ప్రభుత్వరంగ సంస్థ హిందుస్థాన్‌ ఏరోనాటిక్స్‌ (హెచ్‌ఏఎల్‌) ఒప్పందం కుదుర్చుకోవడం ఇందుకు నేపథ్యం. ఈ ఒప్పందం ప్రకారం ఎస్‌జే-100 విమానాలను మనదేశంలోనూ తయారు చేస్తారు. ఇప్పటివరకు ఈ మోడల్‌ విమానాలు 200 తయారవ్వగా, 16 విమానయాన సంస్థలు వినియోగిస్తున్నాయి. భారత్‌లో ప్రయాణికుల కోసం ఈ విమానాలను తయారు చేసే హక్కులు హెచ్‌ఏఎల్‌కు లభిస్తున్నాయి. ‘దేశంలో ఎస్‌జే-100 విమానాల తయారీ భారత విమానయాన పరిశ్రమలో కొత్త అధ్యాయాన్ని లిఖించనుంది. రానున్న పదేళ్లలో ప్రాంతీయ అనుసంధానత పథకం (ఉడాన్‌) కింద ఎస్‌జే-100 వంటి చిన్న పరిమాణం కలిగిన 200 విమానాలు అవసరమవుతాయని భావిస్తున్నాం. హిందూ మహాసముద్ర ప్రాంత పర్యాటక ప్రదేశాలకు సేవలందించేందుకు మరో 350కు పైగా విమానాలు అవసరం. పౌర విమానయాన రంగంలో మనదేశం ఆత్మనిర్భరత సాధించేందుకు ఈ ఒప్పందం కీలకంగా మారుతుంది’ అని హెచ్‌ఏఎల్‌ పేర్కొంది. 103 మంది వరకు ప్రయాణించే సామర్థ్యం కలిగిన ఈ విమానం.. స్వల్ప దూర గమ్యాలకు అనువుగా ఉంటుంది. నిర్వహణ ఖర్చు కూడా తక్కువే. మాస్కోలో జరిగిన ఒప్పంద కార్యక్రమంలో హెచ్‌ఏఎల్‌ సీఎండీ డీకే సునీల్, పీజేఎస్‌సీ-యూఏసీ డైరెక్టర్‌ జనరల్‌ వాది బదేఖా పాల్గొన్నారు.