Microsoft: మైక్రోసాఫ్ట్‌లో ఈసారి వేతన పెంపుల్లేవ్‌..!

వాషింగ్టన్‌: పూర్తిస్థాయి శాశ్వత ఉద్యోగులకు ఈ ఏడాది వేతన పెంపులు లేవని టెక్‌ దిగ్గజం మైక్రోసాఫ్ట్‌ (Microsoft) తెలిపినట్లు సమాచారం. ఈ మేరకు ఇటీవల సీఈఓ సత్య నాదెళ్ల (Satya Nadella) ఉద్యోగులకు లేఖ రాసినట్లు తెలుస్తోంది. ఖర్చులను తగ్గించుకోవడంలో భాగంగానే ఈ నిర్ణయం తీసుకున్నట్లు ఆ లేఖలో పేర్కొన్నారు. 

ఆర్థిక పరిస్థితులు అస్థిరంగా ఉన్న నేపథ్యంలో గత ఏడాది తరహాలో ఈసారి పరిహారాల కోసం పెద్ద ఎత్తున బడ్జెట్‌ కేటాయించలేకపోతున్నామని నాదెళ్ల (Satya Nadella) తెలిపినట్లు ‘ఇన్‌సైడర్‌’ పత్రిక పేర్కొంది. ఈ నేపథ్యంలో వేతన పెంపును నిలిపివేయడంతో పాటు బోనస్‌లు, స్టాక్‌ రివార్డులకు తక్కువ నిధులు కేటాయించనున్నట్లు ఉద్యోగులకు ఆయన తెలియజేశారని సమాచారం. 

కంపెనీ నిర్ణయంపై ఉద్యోగులు అసంతృప్తి వ్యక్తం చేస్తున్నారు. వేతన పెంపు లేకపోవడం ఉద్యోగులకు ఎదురుదెబ్బ అని ఓ ఉద్యోగి సామాజిక మాధ్యమం వేదికగా రాసుకొచ్చారు. ప్రస్తుతం ఇది వైరల్‌గా మారింది.