Vodafone Idea: వొడాఫోన్‌ ఐడియా టేకోవర్‌పై కేంద్రం క్లారిటీ

Vodafone Idea | దిల్లీ: నష్టాల్లో కూరుకుపోయిన టెలికాం కంపెనీ వొడాఫోన్‌ ఐడియాను (Vodafone Idea) టేకోవర్‌ చేసే ఉద్దేశమేదీ ప్రభుత్వానికి లేదని కేంద్రం స్పష్టంచేసింది. కంపెనీని హస్తగతం చేసుకునే ఉద్దేశమేదైనా ఉందా అంటూ పార్లమెంట్‌లో ఓ సభ్యుడు అడిగిన ప్రశ్నకు కమ్యూనికేషన్‌ శాఖ సహాయ మంత్రి దేవ్‌సిన్హ్‌ చౌహాన్‌ బుధవారం లిఖితపూర్వక సమాధానం ఇచ్చారు. అలాంటి ప్రతిపాదన ఏదీ లేదని చెప్పారు.

వొడాఫోన్‌ ఐడియాలో 33.1 శాతం వాటాతో కేంద్ర ప్రభుత్వం అతిపెద్ద షేర్‌ హోల్డర్‌గా ఉంది. రూ.16,133 కోట్ల ఏజీఆర్‌ బకాయిలను కేంద్రం ఈక్విటీ మార్చుకోవడంతో ఈ వాటా దఖలు పడింది. వొడాఫోన్‌ ఐడియాకు ఆర్థికంగా ఊతమివ్వాలన్న ఉద్దేశమే తప్ప.. టెలికాం కంపెనీని టేకోవర్‌ చేసే ఉద్దేశమేదీ లేదని చెప్పారు. యూకేకు చెందిన వొడాఫోన్‌ గ్రూప్‌, భారత్‌కు చెందిన ఆదిత్య బిర్లా గ్రూప్‌నకు చెందిన జాయింట్ వెంచర్‌ అయిన వొడాఫోన్‌ ఐడియా రోజువారీ కార్యకలాపాల్లో తాము జోక్యం చేసుకోబోమని చెప్పారు. బీఎస్‌ఎన్‌ఎల్‌ తన సర్వీసులను మెరుగుపరుచుకునేందుకు తన వంతు ప్రయత్నం చేస్తోందని మరో ప్రశ్నకు సమాధానంగా పేర్కొన్నారు.