Reliance Brands: భారత్‌కు మ్యాక్స్‌ అండ్‌ కో.. ఇటాలియన్‌ బ్రాండ్‌తో రిలయన్స్‌ జట్టు

Reliance Brands | దిల్లీ: ప్రముఖ రిటైల్ దిగ్గజం రిలయన్స్ రిటైల్ అనుబంధ సంస్థ రిలయన్స్‌ బ్రాండ్స్‌ లిమిటెడ్‌ (RBL) ఫ్యాషన్‌ ప్రపంచంలోకి మరో కొత్త బ్రాండ్‌ను ప్రవేశపెట్టనుంది. ఇటాలియన్‌ మహిళల ఫ్యాషన్‌ బ్రాండ్‌ మ్యాక్స్‌ అండ్ కో (MAX & Co)ను భారత మార్కెట్లోకి తీసుకురానుంది. ఇందుకోసం మ్యాక్స్ మారా ఫ్యాషన్‌ గ్రూప్‌తో దీర్ఘకాల మాస్టర్‌ ఫ్రాంఛైజ్‌ ఒప్పందం కుదుర్చుకున్నట్లు ప్రకటించింది. భారత్‌లో మొదటి మ్యాక్స్‌ & కో స్టోర్‌ 2026లో ముంబయిలో ప్రారంభం కానుందని తెలిపింది. తర్వాతి దశలో దేశంలోని ప్రధాన నగరాల్లో విస్తరించనున్నట్లు రిలయన్స్‌ పేర్కొంది.

• 1 నుంచి మారనున్న బ్యాంక్‌, క్రెడిట్‌ కార్డ్‌ రూల్స్‌.. నవంబర్‌ డెడ్‌లైన్స్‌ ఇవే!

ఈ భాగస్వామ్యంతో మ్యాక్స్‌ & కో ఆధునిక, నాణ్యతా ప్రాధాన్యత గల బ్రాండ్‌ను భారత వినియోగదారులకు అందించనుందని రిలయన్స్ పేర్కొంది. ప్రపంచంలోని అతి పెద్ద ఫ్యాషన్‌ హౌజ్‌ల్లో ఒకటైన మ్యాక్స్‌ మారా ఫ్యాషన్‌ గ్రూప్‌తో భాగస్వామ్యం తమకు గర్వకారణంగా ఉందని రిలయన్స్ రిటైల్‌ వెంచర్స్‌ లిమిటెడ్ ఎగ్జిక్యూటివ్‌ డైరెక్టర్‌ ఇషా అంబానీ తెలిపారు. 2007లో రిలయన్స్‌ బ్రాండ్‌ లిమిటెడ్‌ను స్థాపించారు. దేశంలో లగ్జరీ నుంచి ప్రీమియం వరకు విభిన్న స్థాయి ఫ్యాషన్‌, లైఫ్‌స్టైల్‌ బ్రాండ్లను నిర్వహిస్తోంది. కంపెనీకి ప్రస్తుతం 1,590కి పైగా స్టోర్లు ఉన్నాయి. మ్యాక్స్‌ & కో 1986లో ప్రారంభించారు. ఇది మ్యాక్స్‌ మారా ఫ్యాషన్‌ గ్రూప్‌లో ఒక భాగం. ప్రస్తుతం దీనికి ప్రపంచవ్యాప్తంగా 400కు పైగా స్టోర్లు, ఆన్‌లైన్‌ స్టోర్లు ఉన్నాయి.