Retail inflation: 4 నెలల కనిష్ఠానికి రిటైల్‌ ద్రవ్యోల్బణం

Retail inflation | దిల్లీ: దేశంలో రిటైల్‌ ద్రవ్యోల్బణం (Retail inflation) తగ్గుముఖం పట్టింది. ఆహార పదార్థాల ధరలు తగ్గడంతో వినియోగదారుల ధర సూచీ ఆధారిత ద్రవ్యోల్బణం అక్టోబర్‌లో 4.87 శాతంగా నమోదైందని కేంద్ర గణాంక కార్యాలయం తెలిపింది. ఇది నాలుగు నెలల కనిష్ఠం. అంతకుముందు సెప్టెంబర్‌ నెలలో నెల 5.02 శాతంగా ఉంది. చివరిగా జూన్‌ నెలలో రిటైల్‌ ద్రవ్యోల్బణం 4.87 శాతంగా నమోదైంది.

2022-23 ఆర్థిక సంవత్సరానికి రిటైల్‌ ద్రవ్యోల్బణం 6.7 శాతంగా నమోదైన సంగతి తెలిసిందే. ప్రస్తుత ఆర్థిక సంవత్సరం (2023-24) రిటైల్‌ ద్రవ్యోల్బణం 5.4 శాతంగా నమోదు కావొచ్చని రిజర్వ్‌ బ్యాంక్‌ ఆఫ్‌ ఇండియా అక్టోబర్‌ నెల ఎంపీసీ భేటీలో అంచనా వేసింది. రిటైల్‌ ద్రవ్యోల్బణాన్ని 2-6 శాతం మధ్య ఉంచే బాధ్యతను ప్రభుత్వం ఆర్‌బీఐకి అప్పగించిన సంగతి తెలిసిందే. దీంతో పరిస్థితులను బట్టి రెపో రేటును పెంచుతూ వచ్చింది. మరోవైపు కేంద్ర ప్రభుత్వం సైతం తన వంతు చర్యలు చేపడుతోంది.