Share Market: సానుకూలతలున్నా.. అప్రమత్తతే!

లోహ, వాహన షేర్లు రాణించొచ్చు
విశ్లేషకుల అంచనా
స్టాక్‌ మార్కెట్‌
ఈ వారం

ఎన్నికల అనంతరం అధికారం చేపట్టే పార్టీ విషయమై అనిశ్చితి వల్ల అప్రమత్తతతో ఉన్నా, నిఫ్టీ-50 ఈ వారం సానుకూలతలను కనబరచొచ్చని విశ్లేషకులు అంచనా వేస్తున్నారు. గురువారం షార్ట్‌ కవరింగ్‌ కనిపించడానికి తోడు, విదేశీ మదుపర్లు శుక్రవారం నికర కొనుగోలుదార్లుగా మారడం ఇందుకు నేపథ్యమని అంటున్నారు. అయిదో దశ పోలింగ్‌ పూర్తికాగా, ఇంకో 2 దశల్లో పూర్తికానున్న ఎన్నికలపై ఆందోళనల వల్ల లాభాలు పరిమితంగానే ఉండొచ్చంటున్నారు. నిఫ్టీ-50కి 22,300-22,350 వద్ద తక్షణ మద్దతు లభించొచ్చని; 22,600 వద్ద నిరోధం ఎదురు కావొచ్చని సాంకేతిక నిపుణులు అంచనా వేస్తున్నారు. మహారాష్ట్రలో పోలింగ్‌ కారణంగా సోమవారం మార్కెట్లు పనిచేయలేదు. ఈ వారం వెలువడే గ్రాసిమ్, సన్‌ఫార్మా, పవర్‌ గ్రిడ్, ఐటీసీ, హిందాల్కో, ఎన్‌టీపీసీ ఫలితాలను మదుపర్లు గమనించొచ్చు. వివిధ రంగాలపై విశ్లేషకులు ఏమంటున్నారంటే..

•  బ్యాంకింగ్‌ షేర్లలో ఊగిసలాట కొనసాగొచ్చు. అయితే చాలా వరకు షేర్లు తక్కువ పీ/ఏబీవీ (ప్రైస్‌/అడ్జస్టెడ్‌ బుక్‌ వేల్యూ) వద్ద చలిస్తుండడంతో కొనుగోళ్లకు అవకాశం ఉంది. బ్యాంక్‌ నిఫ్టీ 48,500 స్థాయి దిశగా కదలాడొచ్చు. 47,700 కంటే దిగువకు వస్తే కొనుగోళ్లకు అవకాశంగా భావించొచ్చు.
• ఎఫ్‌ఎమ్‌సీజీ షేర్లు ఒక శ్రేణికి లోబడి కదలాడొచ్చు. బులిష్‌ సెంటిమెంటు కొంత కనిపిస్తున్నా.. అంచనాలకు అనుగుణంగా రుతుపవనాల పురోగతి ఉంటుందా అనే అనుమానంతో, ఈ షేర్ల సిఫారసుకు కొంత మంది విశ్లేషకులు దూరం జరుగుతున్నారు.
• లోహ కంపెనీల షేర్లు రాణించే అవకాశం ఉంది. అంతర్జాతీయ సంకేతాలు దన్నుగా నిలవవచ్చు. రేట్ల కోత దిశగా అమెరికా ఫెడ్‌ అడుగులు వేయొచ్చన్న అంచనాలు దోహదం చేయొచ్చు. 
• ఇప్పటిదాకా వెలువడ్డ ఆర్థిక ఫలితాలు బాగుండడంతో యంత్ర పరికరాల షేర్లు సానుకూలంగా చలించొచ్చు. జనవరి-మార్చిలో ఆర్డర్లను మెరుగ్గా పూర్తి చేయడంతో పాటు, ఏప్రిల్‌-జూన్‌లోనూ ఈ ధోరణి కొనసాగొచ్చన్న అంచనాలు కలిసిరావొచ్చు.
• బలమైన ఫలితాలు, ఏప్రిల్‌ నెల విక్రయాల మధ్య వాహన కంపెనీల షేర్లు సానుకూల ధోరణిలో చలించొచ్చు. ఈ వారం నిఫ్టీ ఆటో సూచీకి 23,250 వద్ద మద్దతు; 23,440 వద్ద నిరోధం కనిపిస్తున్నాయి. ఫెడ్‌ విధాన సమీక్ష, మన ఎన్నికల ఫలితాలు కీలకం కానున్నాయి.
• ఇరాన్‌ అధ్యక్షుడి ఆకస్మిక మృతి నేపథ్యంలో, చమురు కంపెనీల షేర్లను జాగ్రత్తగా గమనించాలి. ముడి చమురు ధరలు పెరిగితే ఆ భారాన్ని వినియోగదార్లపై వేయొచ్చన్న అంచనాలు చమురు రిఫైనింగ్‌ కంపెనీలకు ఉపయోగపడొచ్చు. 
• భారతీ ఎయిర్‌టెల్‌ షేర్లు లాభాల్లో, వొడాఫోన్‌ ఐడియా షేర్లు నష్టాల్లో కొనసాగొచ్చు. ఎన్నికల అనంతరం  టెలికాం కంపెనీలు ఛార్జీలపై తీసుకునే నిర్ణయాలను మదుపర్లు     గమనించాలి. 
• మిశ్రమ ఆర్థిక ఫలితాల కారణంగా ఔషధ కంపెనీల షేర్లు ఒక శ్రేణిలోనే చలించొచ్చు. సన్‌ఫార్మా, గ్లాండ్‌ ఫార్మా, టొరెంట్‌ ఫార్మా, గ్లెన్‌మార్క్‌ ఫార్మా, దివీస్‌ కంపెనీల ఫలితాలు ఈ వారం వెలువడనున్నాయి. నిఫ్టీ ఫార్మాకు 19,400 వద్ద నిరోధం; 18,500 వద్ద మద్దతు కనిపిస్తున్నాయి. 
• ఐటీ షేర్లు ఒక శ్రేణిలోనే ట్రేడవవచ్చు. సానుకూల ధోరణి పుంజుకుంటే నిఫ్టీ ఐటీ సూచీ 34,000కు వెళ్లొచ్చు.
• ఈ నెలలోనూ సిమెంటు ధరలు పుంజుకోవడంలో విఫలం కావడంతో, సిమెంటు షేర్లు ఒక శ్రేణికి లోబడి కదలాడొచ్చు. ఎన్నికలు పూరయ్యే వరకు ధరలు పెరగకపోవచ్చు. అల్ట్రాటెక్‌ సిమెంట్, శ్రీసిమెంట్, జేకే సిమెంట్‌లను పరిశీలించొచ్చంటున్నారు.        

  నేటి బోర్డు సమావేశాలు: భెల్, ఎన్‌ఎండీసీ, ఎన్‌ఎండీసీ స్టీల్, పీఐ ఇండస్ట్రీస్, ఇర్కాన్‌ ఇంటర్నేషనల్, జేకే టైర్, జీఎస్‌ఎఫ్‌సీ, ఆజాద్‌ ఇంజినీరింగ్, రెలిగేర్‌ ఎంటర్‌ప్రైజెస్, వెల్‌స్పన్‌ ఎంటర్‌ప్రైజెస్, గల్ఫ్‌ ఆయిల్, మిక్‌ ఎలక్ట్రానిక్స్‌