Stock Market: లాభాల్లో స్టాక్‌ మార్కెట్‌ సూచీలు.. నిఫ్టీ @ 22,268

Stock Market Opening bell | ముంబయి: దేశీయ స్టాక్‌ మార్కెట్‌ (Stock Market) సూచీలు గురువారం లాభాలతో ప్రారంభమయ్యాయి. అంతర్జాతీయ మార్కెట్లలో ప్రతికూల సంకేతాలు ఉన్నప్పటికీ.. మన సూచీలు సానుకూలంగా ప్రారంభమవడం విశేషం. ఉదయం 9:27 గంటల సమయంలో సెన్సెక్స్‌ 334 పాయింట్లు లాభపడి 73,278 వద్ద ట్రేడవుతోంది. నిఫ్టీ 120 పాయింట్లు పెరిగి 22,268 దగ్గర కొనసాగుతోంది. డాలరుతో పోలిస్తే రూపాయి మారకం విలువ రూ.83.49 వద్ద ప్రారంభమైంది.

సెన్సెక్స్‌-30 సూచీలో పవర్‌ గ్రిడ్‌, టాటా స్టీల్‌, ఎం అండ్‌ ఎం, టాటా మోటార్స్‌, రిలయన్స్‌, ఇండస్ఇండ్‌ బ్యాంక్‌, ఎస్‌బీఐ, కోటక్‌ మహీంద్రా బ్యాంక్‌, ఐసీఐసీఐ బ్యాంక్‌, ఎల్‌ అండ్‌ టి, ఇన్ఫోసిస్‌ షేర్లు లాభాల్లో ఉన్నాయి. హెచ్‌సీఎల్‌ టెక్‌, యాక్సిస్‌ బ్యాంక్‌, నెస్లే ఇండియా, ఎన్‌టీపీసీ, టెక్‌ మహీంద్రా, టైటన్‌, ఐటీసీ, అల్ట్రాటెక్‌ సిమెంట్‌, సన్‌ఫార్మా షేర్లు నష్టాల్లో ఉన్నాయి.

అమెరికా మార్కెట్లు (Stock Market) బుధవారం నష్టాలతో ముగిశాయి. నేడు ఆసియా ప్రధాన సూచీలు మిశ్రమంగా కొనసాగుతున్నాయి. అంతర్జాతీయ మార్కెట్‌లో బ్యారెల్‌ బ్రెంట్‌ చమురు ధర 87.55 డాలర్ల వద్ద ట్రేడవుతోంది. ‘విదేశీ సంస్థాగత మదుపర్లు (FIIs)’ మంగళవారం నికరంగా రూ.4,468.09 కోట్ల విలువ చేసే షేర్లను విక్రయించారు. ‘దేశీయ సంస్థాగత మదుపర్లు (DIIs)’ రూ.2,040.38 కోట్ల స్టాక్స్‌ను కొనుగోలు చేశారు.