Sunpharma: సన్‌ఫార్మా డివిడెండు 500%

దిల్లీ: సన్‌ఫార్మా, జనవరి- మార్చి త్రైమాసికానికి ఏకీకృత ప్రాతిపదికన రూ.2,654.58 కోట్ల నికర లాభాన్ని, రూ.11,982.90 కోట్ల ఆదాయాన్ని ప్రకటించింది. 2022-23 ఇదే కాలంలో లాభం రూ.1,984.47 కోట్లు, కార్యకలాపాల ద్వారా ఆదాయం రూ.10,930.67 కోట్లుగా నమోదయ్యాయి. ఫార్ములేషన్‌ అమ్మకాలు భారత్‌లో రూ.3,707.80 కోట్లు, అమెరికాలో 476 మిలియన్‌ డాలర్లుగా (సుమారు రూ.3,964 కోట్లు) నమోదయ్యాయి. వివాల్డిస్‌ హెల్త్‌ అండ్‌ ఫుడ్స్‌లో 60% వాటా కొనుగోలు కారణంగా 2023 డిసెంబరు త్రైమాసికం, 2023-24 ఆర్థిక సంవత్సర ఫలితాలను గతంతో పోల్చిచూడలేమని సన్‌ఫార్మా తెలిపింది. వివాల్డిస్‌లో వాటా కొనుగోలు ప్రక్రియ 2023 జూన్‌  త్రైమాసికంలో పూర్తయ్యింది. 2023-24 ఆర్థిక సంవత్సరానికి రూ.1 ముఖ విలువ గల ఒక్కో షేరుపై రూ.5 (500%) తుది డివిడెండును డైరెక్టర్ల బోర్డు సిఫారసు చేసింది. ఇప్పటికే రూ.8.5 మధ్యంతర డివిడెండును కంపెనీ చెల్లించింది. దీంతో మొత్తం డివిడెండు రూ.13.50కు చేరింది. 2022-23లో చెల్లించిన రూ.11.50 కంటే ఇది ఎక్కువ. 

ఛైర్మన్‌గా దిలీప్‌ సంఘ్వీ..: ప్రస్తుతం మేనేజింగ్‌ డైరెక్టరుగా ఉన్న దిలీప్‌ సంఘ్వీని బోర్డు ఛైర్మన్‌గా నియమించే ప్రతిపాదనకు  డైరెక్టర్ల బోర్డు ఆమోదం తెలిపింది. ఆయన నియామకం తక్షణమే అమల్లోకి రానుంది. పూర్తి ఆర్థిక సంవత్సరానికి (2023-24) సన్‌ఫార్మా ఏకీకృత నికర లాభం రూ.9,576.38 కోట్లు కాగా.. 2022-23లో రూ.8,473.58 కోట్లుగా ఉంది. కార్యకలాపాల ఆదాయం రూ.43,885.68 కోట్ల నుంచి రూ.48,496.85 కోట్లకు పెరిగింది. ఫార్ములేషన్‌ విక్రయాలు భారత్‌లో రూ.14,889.30 కోట్లు, అమెరికాలో 1,854 మిలియన్‌ డాలర్లు (సుమారు రూ.15400 కోట్లు)గా నమోదయ్యాయి. ‘2023-24 ఆర్థిక సంవత్సరంలో మా రెండు వ్యాపారాల వార్షిక విక్రయాలు 100 కోట్ల డాలర్ల మైలురాయిని అధిగమించాయి. కీలక విపణుల్లో ఈ ఘనత సాధించడం, కొన్నేళ్లుగా మేం చేస్తున్న కృషికి దక్కిన ఫలితానికి నిదర్శనమ’ని సంఘ్వీ తెలిపారు. స్పెషాలిటీ పోర్ట్‌ఫోలియోను అభివృద్ధి చేసుకోవడాన్ని కొనసాగించడంతో పాటు వ్యాపారాల విస్తరణకు మరిన్ని పెట్టుబడులు పెడతామని ఆయన పేర్కొన్నారు.