Swiggy Q2 results: స్విగ్గీ Q2 ఫలితాలు.. రూ.1092 కోట్లకు పెరిగిన నష్టం

Swiggy Q2 results | దిల్లీ: ప్రముఖ ఫుడ్‌ డెలివరీ ప్లాట్‌ఫామ్‌ స్విగ్గీ (Swiggy) రెండో త్రైమాసిక ఫలితాలను ప్రకటించింది. ప్రస్తుత ఆర్థిక సంవత్సరంలో జులై-సెప్టెంబర్‌ త్రైమాసికానికి రూ.1,092 కోట్ల నికర నష్టాన్ని నమోదు చేసింది. గతేడాది ఇదే సమయంలో సంస్థ రూ.626 కోట్ల నష్టాన్ని ప్రకటించింది. కార్యకలాపాల ద్వారా వచ్చిన ఆదాయం రూ.3,601 కోట్ల నుంచి రూ.5,561 కోట్లు పెరిగిందని కంపెనీ తన రెగ్యులేటరీ ఫైలింగ్‌లో తెలిపింది. ఖర్చులు గణనీయంగా పెరిగి రూ.4,309 కోట్ల నుంచి రూ.6,711 కోట్లకు చేరుకున్నట్లు పేర్కొంది.

మరోవైపు సమీక్షా త్రైమాసికంలో స్కూట్సీ లాజిస్టిక్స్ ప్రైవేట్ లిమిటెడ్ కింద స్టెప్-డౌన్ సబ్సిడరీగా స్విగ్గీ ఇన్‌స్టామార్ట్ ప్రైవేట్ లిమిటెడ్‌ను ఏర్పాటు చేసింది. ఈ కొత్త సంస్థకు ఇన్‌స్టామార్ట్‌ వ్యాపారాన్ని బదిలీ చేయాలని డైరెక్టర్ల బోర్డు నిర్ణయించింది. దీనికి వాటాదారుల ఆమోదం తెలపాల్సి ఉంది. అలాగే, స్విగ్గీ తన రాపిడోలో ఉన్న మొత్తం పెట్టుబడిని  రూ.2,399 కోట్లను ఉపసంహరించుకోవడంలో భాగంగా ఇదే త్రైమాసికంలో వేర్వేరు పార్టీలతో షేర్‌ పర్చేజ్‌ అగ్రిమెంట్‌ కుదర్చుకున్నట్లు కంపెనీ వెల్లడించింది. ఈ నిర్ణయానికి బోర్డు ఇప్పటికే ఆమోదం తెలిపింది. రాపిడో కూడా ఆహార పదార్థాల డెలివరీ విభాగంలోకి అడుగుపెడుతున్న నేపథ్యంలో స్విగ్గీ తన పెట్టుబడిని ఉపసంహరించుకుంది.