Trump Tariffs: ట్రంప్‌ టారిఫ్‌లు.. బిలియనీర్లకు రూ.17లక్షల కోట్ల నష్టం

ఇంటర్నెట్‌ డెస్క్‌: అమెరికా అధ్యక్షుడు డొనాల్డ్ ట్రంప్‌ టారిఫ్‌ల (Trump Tariffs) దెబ్బకు అంతర్జాతీయంగా అనేక ఎక్స్ఛేంజీ మార్కెట్లు కుదేలైన సంగతి తెలిసిందే. అటు అమెరికా మార్కెట్లు కూడా భారీగా పతనమయ్యాయి. ఈ ఎఫెక్ట్‌ బిలియనీర్లపైనా తీవ్రంగానే పడింది. ప్రపంచవ్యాప్తంగా 500 మంది కుబేరుల మొత్తం సంపద (Billionaires Wealth) 208 బిలియన్‌ డాలర్లు కరిగిపోయింది. అంటే భారత కరెన్సీలో దాదాపు రూ.17లక్షల కోట్లకు పైమాటే..! సంపన్నుల సంపద ఈ స్థాయిలో తరగడం గత దశాబ్ద కాలంలో ఇదే తొలిసారి. ట్రంప్‌నకు అత్యంత సన్నిహితుడైన ఎలాన్‌ మస్క్‌ (Elon Musk) ఆస్తి కూడా భారీగా తగ్గడం గమనార్హం.

• ఈ జాబితాలో అత్యధికంగా నష్టపోయింది మెటా అధినేత మార్క్‌ జుకర్‌బర్గ్‌ (Mark Zuckerberg). ఆయన సంపద ఏకంగా 17.9 బిలియన్‌ డాలర్ల (దాదాపు రూ.1.5లక్షల కోట్లు) మేర ఆవిరైంది. జుకర్‌బర్గ్‌ మొత్తం సంపదలో ఈ నష్టం 9శాతానికి సమానం. ట్రంప్‌ (Donald Trump) టారిఫ్‌ల ప్రకటన తర్వాత అమెరికా మార్కెట్లలో మెటా కంపెనీ షేర్లు దాదాపు 8 శాతానికి పైగా పడిపోవడమే ఇందుక్కారణం.
• ఇక, అమెజాన్‌ షేర్లు 9శాతం మేర కుంగాయి. 2022 ఏప్రిల్‌ తర్వాత ఈ కంపెనీ షేర్లు ఇంత భారీగా తగ్గడం ఇదే తొలిసారి. దీంతో సంస్థ అధినేత జెఫ్‌ బెజోస్‌ (Jeff Bezos) వ్యక్తిగత నికర సంపద 15.9 బిలియన్‌ డాలర్లు (దాదాపు రూ.1.3లక్షల కోట్లు) తరిగిపోయింది.
• టెస్లా షేర్లు 5.5శాతం మేర తగ్గడంతో ఎలాన్‌ మస్క్‌ సంపద 11 బిలియన్‌ డాలర్ల (దాదాపు రూ.93వేల కోట్లు) మేర కరిగిపోయింది.
• డెల్‌ సీఈఓ మైఖేల్‌ డెల్‌ సంపద 9.53 బిలియన్‌ డాలర్లు (దాదాపు రూ. 81వేల కోట్లు), ఒరాకిల్‌ చీఫ్‌ టెక్నాలజీ ఆఫీసర్‌ ల్యారీ ఎలిసన్‌ ఆస్తి 8.1 బిలియన్‌ డాలర్ల (దాదాపు రూ.69వేల కోట్లు) మేర తగ్గింది.
• ఎన్విడియా సీఈఓ జేసెన్‌ హువాంగ్‌కు 7.36 బిలియన్‌ డాలర్లు, గూగుల్‌ మాజీ సీఈఓ ల్యారీ పేజ్‌కు 4.79 బిలియన్‌ డాలర్లు, గూగుల్‌ సహ వ్యవస్థాపకుడు సెర్గీ బ్రిన్‌కు 4.46 బిలియన్‌ డాలర్ల మేర నష్టం వాటిల్లింది.
• ఫ్రాన్స్‌ సంపన్నుడు బెర్నార్డ్‌ ఆర్నాల్ట్‌ సంపద 6 బిలియన్‌ డాలర్లు తరిగిపోయిందని బ్లూమ్‌బర్గ్‌ బిలియనీర్ ఇండెక్స్‌ సూచీ వెల్లడించింది.