Wipro Walk-In: విప్రో వాక్‌-ఇన్‌కు క్యూ కట్టిన నిరుద్యోగులు

ఇంటర్నెట్‌ డెస్క్‌: గతేడాది చివరి నుంచి ఐటీ దిగ్గజ సంస్థలు లేఆఫ్‌లు అమలు చేస్తున్నాయి. దీంతో ఉద్యోగం కోల్పోయిన వారు మరో అవకాశం కోసం తీవ్ర ప్రయత్నాలు చేస్తున్నారు. ఈ క్రమంలో ఎక్కడ వాక్‌-ఇన్‌ ఇంటర్వ్యూలు జరిగినా ఉద్యోగార్థులు తమ వివరాలతో ఆయా సంస్థల ముందు క్యూ కడుతున్నారు. తాజాగా, కోల్‌కతాలో విప్రో సంస్థ చేపట్టిన వాక్‌-ఇన్‌ ఇంటర్వ్యూలకు పెద్ద ఎత్తున ఉద్యోగార్థులు వచ్చారు. దీనికి సంబంధించిన వీడియో సామాజిక మాధ్యమాల్లో వైరల్‌గా మారింది. 

‘‘వీడియోలో ఉన్న వారంతా కోల్‌కతాలోని విప్రో క్యాంపస్‌లో వాక్‌-ఇన్‌ ఇంటర్వ్యూల కోసం వచ్చారు. సంస్థ ఖాళీలు ప్రకటించింది తక్కువ ఉద్యోగాలకే అయినా.. సుమారు పదివేల మంది ఇంటర్వ్యూ కోసం వచ్చారు. దేశంలో జాబ్‌ మార్కెట్‌ పరిస్థితికి ఇది నిదర్శనం’’ అంటూ ఓ యూజర్‌ ఎక్స్ (Twitter)లో వీడియో షేర్‌ చేశాడు. గత కొద్దిరోజులుగా విప్రో సంస్థ దేశంలోని వివిధ నగరాల్లోని కార్యాలయాల్లో వాక్‌-ఇన్‌ ఇంటర్వ్యూలు నిర్వహిస్తోంది. ఈ క్రమంలో కోల్‌కతా కార్యాలయానికి పెద్ద సంఖ్యలో ఉద్యోగార్థులు రావడం గమనార్హం. 

కీలక వడ్డీరేట్లు యథాతథమే

ఈ వీడియో చూసిన నెటిజన్లు దేశంలో జాబ్ మార్కెట్‌ పరిస్థితిపై తమదైన శైలిలో కామెంట్లు చేస్తున్నారు. ‘జాబ్‌ మార్కెట్‌ ఎప్పుడూ ఒడుదొడుకులకు గురవుతూనే ఉంటుంది. అమెరికాలో అధిక వడ్డీరేట్లు ఆ దేశంలో కంటే భారత్‌లోని ఉద్యోగాలపైనే అధిక ప్రభావం చూపాయి’ అని ఒక యూజర్‌ కామెంట్‌ చేయగా.. ‘వాక్‌-ఇన్‌ ఇంటర్వ్యూలు ఎప్పుడూ అంత సులభం కాదు’ అంటూ మరో యూజర్‌ తన అభిప్రాయం వ్యక్తం చేశారు.