Vodafone Idea: ‘మస్క్‌’తో చర్చలపై వొడాఫోన్‌ ఐడియా క్లారిటీ.. షేర్లు డౌన్‌!

దిల్లీ: దేశీయ టెలికాం సంస్థ వొడాఫోన్‌ ఐడియా లిమిటెడ్‌ (Vodafone Idea - VI) షేర్లు గత రెండు ట్రేడింగ్‌ సెషన్లలో అనూహ్యంగా పుంజుకున్నాయి. కంపెనీలో కొంత వాటాను బిలియనీర్‌ ఎలాన్‌ మస్క్‌కు (Elon Musk) చెందిన శాటిలైట్‌ కమ్యూనికేషన్ల సంస్థ స్టార్‌లింక్‌కు (StarLink) విక్రయించనున్నట్లు వార్తలు వచ్చిన విషయం తెలిసిందే. ఈ మేరకు స్టార్‌లింక్‌తో వీఐ చర్చలు జరుపుతున్నట్లు పలు కథనాలు పేర్కొన్నాయి. కంపెనీలో ప్రభుత్వానికి ఉన్న 33 శాతం వాటాను విక్రయించే అవకాశం ఉందని ఊహాగానాలు వినిపించాయి. ఈ నేపథ్యంలోనే వీఐ షేర్లు ఎగబాకాయి. అయితే, తాజాగా ఈ అంశంపై కంపెనీ క్లారిటీ ఇచ్చింది.

స్టార్‌లింక్‌తో (StarLink) తాము ఎలాంటి చర్చలు జరపడం లేదని స్పష్టం చేసింది. అసలు ఈ వార్తలకు ఆధారమేంటో తమకు తెలియదని పేర్కొంది. ఈ మేరకు రెగ్యులేటరీ ఫైలింగ్‌లో స్పష్టతనిచ్చింది. షేరు విలువను ప్రభావితం చేసే ఎలాంటి సమాచారాన్నైనా రెగ్యులేటరీలకు వెంటనే తెలియజేస్తామని పేర్కొంది. ఈ ప్రకటన తర్వాత కంపెనీ షేరు విలువ కిందకు దిగొచ్చింది. మంగళవారం మధ్యాహ్నం 2:04 గంటల సమయంలో షేరు ధర 5.59 శాతం కుంగి రూ.16.05 దగ్గర ట్రేడవుతోంది.