Wipro: వారంలో 3 రోజులు ఆఫీసుకు రావాల్సిందే.. ఉద్యోగులకు విప్రో సమాచారం

దిల్లీ: వారంలో కనీసం మూడు రోజులు ఆఫీసుకు రావాలని ఐటీ దిగ్గజం విప్రో తమ ఉద్యోగులను కోరింది. ఈ విషయాన్ని ఇ-మెయిల్‌ ద్వారా మంగళవారం వారికి తెలియజేసింది. అక్టోబరు 10 నుంచి కార్యాలయాలు తెరిచి ఉంటాయని తెలిపింది. సోమ, మంగళ, గురు, శుక్రవారాల్లో.. ఏదైనా మూడు రోజులు ఆఫీసుకు రావొచ్చని పేర్కొంది. బుధవారం మాత్రం కార్యాలయాలు మూసి ఉంచుతున్నట్లు తెలిపింది. హైబ్రిడ్‌ పని విధానాన్ని కొనసాగిస్తూనే ఉద్యోగుల మధ్య అనుబంధం, బృందస్ఫూర్తిని పెంపొందించాలన్న ఉద్దేశంతోనే ఈ నిర్ణయం తీసుకున్నట్లు వెల్లడించింది.

విప్రో నిర్ణయంపై ఐటీ రంగ ఉద్యోగుల సంఘం నైట్స్‌ (NITES) అభ్యంతరం వ్యక్తం చేసింది. ఇలా ఉన్నపళంగా ఆఫీసుకు రమ్మని పిలవడం సమంజసం కాదని పేర్కొంది. కనీసం నెల సమయం ఇవ్వాల్సిందని అభిప్రాయపడింది. తద్వారా ఉద్యోగులు కావాల్సిన ప్రాంతాలకు చేరుకొని అక్కడ సర్దుబాటు కావడానికి సరిపడా సమయం లభించేదని తెలిపింది. అలాగే ఆఫీసుకు రావడంపై ఉద్యోగుల అభిప్రాయాల్ని ముందుగా తెలుసుకోవాల్సిందని హితవు పలికింది.

భారత్‌లో ఐటీ సేవల సంస్థలు తమ ఉద్యోగుల్ని తిరిగి ఆఫీసులకు రప్పించేందుకు అనేక చర్యలు చేపడుతున్నాయి. గతనెల టీసీఎస్‌ సైతం వారంలో కనీసం మూడు రోజులు కార్యాలయాలకు రావాల్సిందేనని ఆదేశించింది. ఏ మూడు రోజులు రావాలో తమ బృంద నాయకులు, మానవ వనరుల విభాగంతో చర్చించి నిర్ణయం తీసుకోవాలని తెలిపింది.