Best Airports: ప్రపంచంలో బెస్ట్‌ ఎయిర్‌పోర్టులివే.. భారత విమానాశ్రయాలు ఏ స్థానంలో..?

ఇంటర్నెట్‌ డెస్క్‌: దోహాలోని హమద్‌ అంతర్జాతీయ విమానాశ్రయం ప్రపంచంలోనే అత్యుత్తమ ఎయిర్‌పోర్టుగా (Worlds Best Airport 2024) నిలిచింది. సింగపూర్‌కు చెందిన ఛాంగి రెండో స్థానంలో ఉంది. కొన్నేళ్లుగా ఈ జాబితాలో తొలి రెండు స్థానాలను ఈ రెండే పంచుకుంటుండడం విశేషం. స్కైట్రాక్స్‌ ఏటా విడుదల చేసే ఈ నివేదికలో గతేడాది ఛాంగి అగ్రభాగాన నిలిచింది.

సియోల్‌ ఇన్చెయాన్‌ విమానాశ్రయం మూడో స్థానంలో నిలిచింది. 2024లో ఫ్యామిలీ ఫ్రెండ్లీ ఎయిర్‌పోర్టుగానూ ఇది అవార్డు సొంతం చేసుకుంది. టోక్యోలోని హనీదా, నరీతా వరుసగా నాలుగు, ఐదు స్థానాలను దక్కించుకున్నాయి. హాంకాంగ్‌ అంతర్జాతీయ విమానాశ్రయం ఏకంగా 22 స్థానాలు ఎగబాకి 11వ ర్యాంకుకు చేరుకోవడం విశేషం. కొవిడ్‌ ఆంక్షలు పూర్తిగా ఎత్తివేయడంతో ప్రయాణికుల సంఖ్య గణనీయంగా పెరగడం అందుకు దోహదం చేసింది.

అమెరికాకు చెందిన ఏ ఒక్క విమానాశ్రయం కూడా తొలి 20 స్థానాల్లో లేకపోవడం గమనార్హం. సియాటెల్‌లోని టకోమా ఎయిర్‌పోర్టుకు దక్కిన 24వ ర్యాంకే ఆ దేశానికి అత్యుత్తమైనది. ఐరోపా ప్రాంతంలో ప్యారిస్‌ చార్లెస్‌ డి గలే, మ్యూనిచ్‌, జ్యూరిక్‌ టాప్‌-10లో చోటు దక్కించుకున్నాయి.

భారత విమానాశ్రయాలు ఇలా..

ఈ జాబితాలో తొలి 100 ఎయిర్‌పోర్టుల్లో భారత్‌కు చెందినవి నాలుగు మాత్రమే ఉన్నాయి. దిల్లీ ఇందిరాగాంధీ అంతర్జాతీయ విమానాశ్రయం 36వ స్థానంలో నిలిచింది. బెంగళూరు ఎయిర్‌పోర్టు స్థానం 69 నుంచి 59కి మెరుగైంది. హైదరాబాద్‌లోని రాజీవ్‌ గాంధీ ఇంటర్నేషనల్‌ ఎయిర్‌పోర్టు స్థానం 65 నుంచి 61కి ఎగబాకింది. ముంబయి ఛత్రపతి శివాజీ ఇంటర్నేషనల్‌ ఎయిర్‌పోర్టు మాత్రం 84 నుంచి 95వ స్థానానికి పడిపోయింది.

దిల్లీ విమానాశ్రయం దక్షిణాసియాలో బెస్ట్‌ ఎయిర్‌పోర్టుగా నిలిచింది. సిబ్బంది సేవల్లో హైదరాబాద్‌ ఎయిర్‌పోర్టు దక్షిణాసియాలోనే అగ్రస్థానం దక్కించుకుంది. అలాగే దక్షిణాసియాలో ఉత్తమ ప్రాంతీయ ఎయిర్‌పోర్టుగా బెంగళూరు నిలిచింది.

• న్యూయార్క్‌లోని జెఎఫ్‌కే విమానాశ్రయం ఐదు స్థానాలు కోల్పోయి 93లో నిలిచింది. లాగార్డియా 57 నుంచి 33కు ఎగబాకింది.
• ఆస్ట్రేలియాలో మెల్‌బోర్న్‌ ఎయిర్‌పోర్టు తొలిస్థానంలో నిలిచింది. జాబితాలో 19వ స్థానాన్ని నిలబెట్టుకుంది.
• లండన్‌ హీత్రో విమానాశ్రయం ఒక స్థానం మెరుగుపడి 21కి చేరింది. గాట్విక్‌ ఏడు స్థానాలు ఎగబాకి 48లో నిలిచింది.
• జపాన్‌కు చెందిన ఒకినావా ఎయిర్‌పోర్టు ఏకంగా 199 నుంచి 91వ స్థానానికి చేరడం విశేషం.

ప్రపంచంలో తొలి 20 అత్యుత్తమ విమానాశ్రయాలు ఇవే..

1.హమద్‌ (దోహా) 2.ఛాంగి (సింగపూర్‌) 3.ఇన్చెయాన్‌ (సియోల్‌) 4.హనీదా (టోక్యో) 5.నరీతా (టోక్యో) 6.చార్లెస్‌ డి గలే (పారిస్‌) 7.దుబాయ్‌ (యూఏఈ) 8.మ్యూనిచ్‌ (జర్మనీ) 9.జ్యూరిక్‌ (స్విట్జర్లాండ్‌) 10.ఇస్తాంబుల్‌ (తుర్కియే) 11.హాంకాంగ్‌ 12.ఫ్యూమిసినో (రోమ్‌) 13.వియన్నా (ఆస్ట్రియా) 14.వాంటా (హెల్సింకీ) 15.బరజాస్‌ (మ్యాడ్రిడ్‌) 16.సెంట్రైర్‌ నగోయా (జపాన్‌) 17.వాంకోవర్‌ (కెనడా) 18.కాన్సాయ్‌ (జపాన్‌) 19. మెల్‌బోర్న్‌ (ఆస్ట్రేలియా) 20.కోపెన్‌ హెగెన్‌ (డెన్మార్క్‌)