నదిలో ఈతకు వెళ్లి ఐదుగురు బీటెక్‌ విద్యార్థులు మృతి

రామనగర: కర్ణాటకలో పెను విషాదం చోటుచేసుకుంది. సరదాగా ఈత కొట్టేందుకు కావేరి నదిలో దిగిన ఐదుగురు ఇంజినీరింగ్‌ విద్యార్థులు విగతజీవులుగా మారారు. రామనగర జిల్లా కనకపురలో మేకెదాటు వద్ద కావేరీ నది సంగమంలో ఈ విషాదం చోటుచేసుకున్నట్లు పోలీసులు వెల్లడించారు. మృతుల్లో ముగ్గురు అమ్మాయిలు కాగా.. ఇద్దరు అబ్బాయిలు ఉన్నట్లు గుర్తించారు. బెంగళూరు నుంచి 12మంది కాలేజీ విద్యార్థులు కలిసి ఇక్కడికి వచ్చారని.. వీరిలో ఐదుగురు ఈత కొడుతుండగా ప్రమాదవశాత్తు మునిగిపోయినట్లు సతనూరు పోలీసులు తెలిపారు. మృతులను హర్షిత (20), అభిషేక్‌ (20), తేజస్‌ (21), వర్ష (20), నేహా (19)గా గుర్తించామన్నారు. తొలుత ఒక విద్యార్థి ఈత కొట్టేందుకు నదిలోకి దిగి కొట్టుకుపోగా.. అతడిని కాపాడేందుకు దిగిన విద్యార్థులు.. ఒకరితర్వాత ఒకరు నీటిలో మునిగి ప్రాణాలు కోల్పోయినట్లు తెలుస్తోంది.