Hyderabad News: 24 గంటలు గడవక ముందే మరో పెళ్లి.. భర్త ఇంటిముందు ఆందోళన

ప్రేమికుడి ఇంటి ముందు ఆందోళన చేస్తున్న యువతితో మహిళా సంఘాల సభ్యులు

హబ్సిగూడ, న్యూస్‌టుడే: పెళ్లైన 24 గంటలు గడవకముందే నన్ను ప్రేమించి మరో యువతితో పెళ్లి చేసుకోవడం ఏంటంటూ.. పెళ్లి బాజాలు మోగిన ఇంటి ముందు ఓ యువతి నిరసనకు దిగిన ఘటన గురువారం హైదరాబాద్‌ హబ్సిగూడ డివిజన్‌ వెంకట్‌రెడ్డినగర్‌లో జరిగింది. వివరాల్లోకి వెళితే.. వెంకట్‌రెడ్డినగర్‌కు చెందిన శ్రీకాంత్‌చారీ.. తాను 15 ఏళ్లుగా ప్రేమించుకుంటున్నామని రామంతాపూర్‌కు చెందిన లక్ష్మి(29) తెలిపింది.

తనను కాదని బుధవారం మరో యువతిని పెళ్లి చేసుకున్నాడని వాపోయింది. ప్రేమ పేరిట మోసం చేసి మరొక వివాహం చేసుకున్న శ్రీకాంత్‌చారీపై చట్టపరమైన చర్యలు తీసుకోవాలని డిమాండ్‌ చేస్తూ.. బాధితురాలు గురువారం నిందితుడి ఇంటి ముందు ఆందోళనకు దిగింది. ఆదర్శ మహిళా సంఘం సభ్యులు మద్దతు తెలిపారు. ప్రేమ, పెళ్లి కథ చివరకు ఉప్పల్‌ పోలీస్‌ స్టేషన్‌కు చేరింది. లక్ష్మికి న్యాయం జరిగే వరకు పోరాటం ఆగదని మహిళా సంఘాల నేతలు హెచ్చరించారు. నిరసనలో ప్రతిభా, మంజుల, సంధ్య, బేగం, జానకి, బాలమణి తదితరులు పాల్గొన్నారు.