వేటగాళ్ల ఉచ్చుకు ఏనుగు బలి

ఇద్దరిని అదుపులోకి తీసుకుని విచారణ

గంగవరం, న్యూస్‌టుడే: వన్యప్రాణుల కోసం వేటగాళ్లు అమర్చిన విద్యుత్‌ ఉచ్చు తగిలి ఓ ఏనుగు మృతి చెందింది. చిత్తూరు జిల్లా గంగవరం మండలం బూడిదపల్లె శివారులో గురువారం తెల్లవారుజామున ఈ సంఘటన చోటుచేసుకుంది. అటవీ అధికారుల కథనం మేరకు.. గ్రామానికి చెందిన కొందరు వేటగాళ్లు అటవీ జంతువులే లక్ష్యంగా గ్రామానికి చెందిన లక్ష్మయ్య పొలంలో విద్యుత్‌ ఉచ్చులు ఏర్పాటుచేశారు. కౌండిన్య అటవీ ప్రాంతం సమీపంలో ఉండటంతో బుధవారం రాత్రి ఏనుగుల మంద గ్రామ సమీపానికి వచ్చాయి. వాటిలో ఓ ఏనుగు మెడకు విద్యుత్‌ ఉచ్చు తగలడంతో విద్యుదాఘాతంతో అక్కడికక్కడే కుప్పకూలింది. కొందరు గమనించి విషయాన్ని గంగవరం సీఐ చినగోవిందు, అటవీ అధికారులకు తెలిపారు. గ్రామానికి చెందిన అయిదుగురిని అనుమానితులుగా అధికారులు తేల్చారు. వారిలో ఇద్దరిని అదుపులోకి తీసుకున్నారు.