12 మంది కల్తీ విత్తన విక్రేతలపై క్రిమినల్‌ కేసులు

ఈనాడు, హైదరాబాద్‌: రైతులకు కల్తీ విత్తనాలు విక్రయించిన 12మందిని గుర్తించి క్రిమినల్‌ కేసులు నమోదు చేసినట్లు వ్యవసాయ శాఖ తెలిపింది. లైసెన్స్‌ గల డీలర్ల నుంచి మాత్రమే విత్తనాలను కొనుగోలు చేయాలని.. తప్పనిసరిగా రసీదు తీసుకోవాలని పంట కోతలు పూర్తయ్యే వరకు దానిని భద్రపరుచుకోవాలని పేర్కొంది. ‘‘వానాకాలం సీజన్‌లో రైతులు కల్తీ విత్తనాలు కొని మోసపోవద్దు. నాణ్యమైన విత్తనాలు అందించేందుకు ప్రభుత్వం చర్యలు చేపట్టింది. కల్తీ విత్తనాలను నిరోధించేందుకు ఇప్పటికే వ్యవసాయ, పోలీసు, విజిలెన్స్‌ శాఖలను ప్రభుత్వం అప్రమత్తం చేసింది. సరిహద్దు రాష్ట్రాలను ఆనుకొని ఉన్న జిల్లాల్లో ఇతర రాష్ట్రాల నుంచి విత్తనాల అక్రమ రవాణాను అడ్డుకునేందుకు తనిఖీ బృందాలను ఏర్పాటు చేసింది.  లైసెన్స్‌ లేకుండా రైతులను మభ్యపెట్టి నిషేధిత పత్తి, ఇతర విత్తనాలను విక్రయించే వారిపై గట్టి నిఘా పెట్టాం. విత్తన నియంత్రణ చట్టం-1983 ప్రకారం లైసెన్స్‌లు లేకుండా విత్తనాలను విక్రయించడం నేరం’’ అని వ్యవసాయ శాఖ పేర్కొంది.