వసతి గృహంలో విద్యార్థి బలవన్మరణం

జోగిపేట, న్యూస్‌టుడే: సంగారెడ్డి జిల్లా చౌటకూరు మండలం సుల్తాన్‌పూర్‌లోని జేఎన్‌టీయూ ఇంజినీరింగ్‌ కళాశాలలో ఓ విద్యార్థి ఆత్మహత్య చేసుకోవడం కలకలం రేపింది. డీఎస్పీ సత్తయ్య తెలిపిన ప్రకారం... సూర్యాపేట జిల్లా పెద్దరాజు తండా మోతెకు చెందిన బానోత్‌ మహేందర్‌(22) జేఎన్‌టీయూ ఇంజినీరింగ్‌ కళాశాలలో చదువుతున్నాడు. శుక్రవారం కళాశాలకు వెళ్లిన విద్యార్థి... మధ్యాహ్నం క్యాంటీన్‌లో భోజనం చేసి హాస్టల్‌కు వచ్చాడు. గదిలో ఎవరూ లేని సమయంలో ఫ్యాన్‌కు ఉరేసుకున్నాడు. గమనించిన తోటి విద్యార్థులు తలుపులు పగులగొట్టి మహేందర్‌ను కళాశాలకు చెందిన అంబులెన్స్‌లో సంగారెడ్డి సమీపంలోని ఓ ఆసుపత్రికి తరలించారు. పరీక్షించిన వైద్యులు విద్యార్థి మృతిచెందినట్లు ధ్రువీకరించారు. విద్యార్థి గదిలో సెల్‌ఫోన్‌ను స్వాధీనం చేసుకున్నామని, కేసు  దర్యాప్తు చేస్తున్నట్లు డీఎస్పీ వివరించారు.