Medak: టైరు పేలి రాంగ్‌రూట్‌లోకి కారు.. ఆపై లారీ ఢీ కొనడంతో ఇద్దరి మృతి

చేగుంట: మెదక్ జిల్లా నార్సింగి మండలం వల్లూరు వద్ద జరిగిన రోడ్డు ప్రమాదంలో తండ్రీకుమారుడు దుర్మరణం చెందారు. నార్సింగి మండలం నర్సంపల్లికి చెందిన తౌర్య నాయక్ (50) తన చిన్న కుమారుడు అంకిత్‌ (10)తో కలిసి కారులో చేగుంటకు బయలు దేరారు. వల్లూరు అటవి ప్రాంతంలో జాతీయ రహదారిపై టైరు పేలడంతో.. కారు డివైడర్‌ను దాటి రాంగ్‌రూట్‌లోకి దూసుకెళ్లింది. అదే సమయంలో హైదరాబాద్‌ నుంచి వస్తున్న కంటైనర్.. కారును ఢీ కొనడంతో ఇద్దరు అక్కడికక్కడే మృతి చెందారు. మృతుడు తౌర్య నాయక్‌ గతంలో నార్సింగి మండల భారాస అధ్యక్షుడిగా పని చేశారు. ఘటనాస్థలికి చేరుకున్న పోలీసులు.. మృతదేహాలను రామాయంపేట ఆస్పత్రికి తరలించారు. ఘటనపై కేసు నమోదు చేసి దర్యాప్తు చేపట్టారు.