పిఠాపురం.. కొరకరాని కొయ్య

ప్రలోభాలతో వైకాపా అడ్డగోలు ప్రయత్నాలు

కాకినాడ కలెక్టరేట్‌:  పిఠాపురం నియోజకవర్గంలో జనసేనాని పవన్‌ కల్యాణ్‌ను ఎదుర్కొనేందుకు అధికార వైకాపా చేయని కుటిల ప్రయత్నాలు లేవు. పోలింగ్‌కు పక్షం రోజుల ముందు నుంచే ఓటర్లను మచ్చిక చేసుకోడానికి నగదు ఎరవేస్తోంది. రూ. వందల కోట్లు ఖర్చు చేసైనా పిఠాపురం పీఠమెక్కాలని లోతైన కుట్ర చేస్తోంది. జనసేనాని పవన్‌కల్యాణ్‌కు పూర్తిగా మద్దతు తెలుపుతున్న వర్గాలపై గురిపెట్టి నగదు పంపిణీకి తెరతీసింది. ప్రధానంగా యు.కొత్తపల్లి మండలంలోని మత్స్యకార గ్రామాలపై దృష్టిపెట్టి వేట నిషేధ సమయమైనందున రేషన్‌ కార్డుకు రూ.1,500 లెక్కన పంపిణీ చేస్తోంది. పోలింగ్‌కు ముందు మరింత ఇస్తామని ఓటర్లకు ఆశ చూపుతున్నారు. ఈ నియోజకవర్గంలో జనసేనానికి అనేక వర్గాలు మద్దతు తెలుపుతున్నాయి. స్థానిక సంస్థల ప్రతినిధులు ఆయన వెంట నడిచేందుకు సిద్ధ్ధమవుతున్నారు. తమ పార్టీ నుంచి గెలిచిన సర్పంచి, ఎంపీటీసీ, జడ్పీటీసీ సభ్యులు జారిపోకుండా సొమ్ముతో వైకాపా కట్టడి చేస్తుందనే ప్రచారం జరుగుతోంది. అలానే రెండు,మూడు గ్రామాలకు ఒక కేంద్రాన్ని ఏర్పాటు చేసుకుని, మద్యం నిల్వ చేశారనే ఆరోపణలు ఉన్నాయి. ఎన్నికల నిఘా బృందాలు జల్లెడ పడితే డంప్‌లు వెలుగుచూసే అవకాశం ఉందిన పలువురు పేర్కొంటున్నారు.