Laziness: నిద్రలేమితో ఉద్యోగుల్లో బద్ధకం

ఈనాడు, హైదరాబాద్‌: నిద్రలేమితో సతమతమవుతున్న నగరవాసుల్లో 56 శాతం మంది పనివేళల్లో నిద్రమత్తుతో బద్ధకంగా ఉంటున్నారని ‘వేక్‌ఫిట్‌ గ్రేట్‌ ఇండియన్‌ స్లీప్‌ స్కోర్‌కార్డ్‌ 2024’ సర్వే వెల్లడించింది. హైదరాబాద్‌ నగరంలో 10వేల మంది ఉద్యోగులు, గృహిణులు, విద్యార్థుల అభిప్రాయాలను సేకరించి నగరవ్యాప్తంగా స్లీప్‌ ట్రెండ్స్‌ వివరాలను వెల్లడించింది. 91శాతం మంది నిద్రకు ఉపక్రమించే ముందు సెల్‌ఫోన్లు ఉపయోగిస్తున్నట్టు చెప్పారని పేర్కొంది. నగరవాసుల్లో 36 శాతం మంది రాత్రి 11గంటల తర్వాతే నిద్రకు ఉపక్రమిస్తున్నారని, 33 శాతం మంది ఇన్‌సోమ్నియా ఉందని ఆందోళన వ్యక్తంచేస్తున్నట్టు వెల్లడించారు. షిప్టుల్లో పనిచేయడంతో నిద్రలేమి సమస్య ఉందని 32శాతం మంది పేర్కొన్నారు. ఇందుకు పరిష్కారం.. నిద్రించే వాతావరణం అనువుగా ఉండాలని 59శాతం, సెల్‌ఫోన్‌ను దూరం పెట్టడమే పరిష్కారమని 41శాతం మంది అభిప్రాయాలను వెల్లడించారు. ప్రతి నలుగురిలో ఒకరు నిద్ర లేమి సమస్యతో బాధపడుతున్నట్లు  వెల్లడైంది.