కడుపులో మాదక ద్రవ్యాల గుట్ట

మహిళ కడుపులో దాచిన మాదకద్రవ్య గుళికలు

బెంగళూరు (యశ్వంతపుర), న్యూస్‌టుడే : బెంగళూరు కెంపేగౌడ అంతర్జాతీయ విమానాశ్రయం కస్టమ్స్‌ అధికారులు ఆఫ్రికాకు చెందిన ఓ మహిళను తనిఖీ చేసిన సమయంలో భారీగా మాదకద్రవ్యాలు వెలుగు చూశాయి. ఆమె కడుపులో క్యాప్సూల్స్‌ రూపంలో ఉన్న రూ.6.68 కోట్ల విలువ చేసే 685 గ్రాముల కొకైన్‌ స్వాధీనం చేసుకున్నారు. కేసు నమోదు చేసి ఆఫ్రికా నుంచి వచ్చిన సియోరా వియోన్‌ (40) అనే మహిళను విచారిస్తున్నట్లు అధికారులు వివరించారు. ఈనెల 14న పడమటి ఆఫ్రికాలోని గినియా విమానాశ్రయం నుంచి ఆమె దుబాయి మీదుగా బెంగళూరు కెంపేగౌడ అంతర్జాతీయ విమానాశ్రయంలో దిగారు. ఆమె ప్రవర్తన, నడక అనుమానాస్పదంగా ఉండటంతో అధికారులు అదుపులోకి తీసుకున్నారు. శరీరంలో మాదక ద్రవ్యాలు ఉండవచ్చుననే అనుమానంతో ఆసుపత్రికి తరలించి శోధించారు. వారం రోజుల తరువాత కడుపులో దాగున్న 58 గుళికలను బయటకు తీశారు. అంతర్జాతీయ విమానాశ్రయం పోలీసులు కేసు నమోదు చేసుకుని విచారణ చేపట్టారు.