పెత్తందారీ పాలనలో రాష్ట్రం నాశనం

జగనాసుర రక్తచరిత్ర కరపత్రం చూపుతున్న మల్లెల రాజశేఖర్‌

ఓర్వకల్లు, న్యూస్‌టుడే : పెత్తందారీ పాలనలో రాష్ట్రం పూర్తిగా నాశనమైందని తెదేపా నంద్యాల జిల్లా అధ్యక్షుడు మల్లెల రాజశేఖర్‌ ఆరోపించారు. మండలంలోని హుసేనాపురంలో జగనాసుర రక్తచరిత్ర కరపత్రాన్ని శనివారం విడుదల చేసి మాట్లాడారు. రాష్ట్రంలో వైకాపా ప్రభుత్వం అధికారంలోకి వచ్చిన తర్వాత ఒక్కో కుటుంబంపై రూ.10 లక్షల వరకు పన్నుల భారం పడిందన్నారు. ల్యాండ్‌, శాండ్‌, మైన్స్‌, గంజాయి, డ్రగ్స్‌, ఎర్రచందనం, రేషన్‌ బియ్యం తదితరాలకు సంబంధించి రూ.8 లక్షల కోట్లు కొల్లగొట్టారని ఆరోపించారు. జగన్‌ పదిసార్లు విద్యుత్తు బిల్లులు పెంచి రూ.75 వేల కోట్ల భారాన్ని ప్రజలపై మోపారన్నారు. రానున్న ఎన్నికల్లో వైకాపాను ప్రజలు ఇంటికి పంపడం ఖాయమన్నారు. ఈ కార్యక్రమంలో నాయకులు మహబూబ్‌బాషా, వేణుగోపాల్‌, సుధాకర్‌, రామగోవిందు పాల్గొన్నారు.