నెల రోజుల్లో ధర రెండింతలు

కొనలేని స్థితిలో కూరగాయలు

కల్వకుర్తి మార్కెట్‌లో ట్రేలలో పోస్తున్న టమాటలు

కల్వకుర్తి పట్టణం, న్యూస్‌టుడే: అకాల వర్షాలు, అధిక ఉష్ణోగ్రతల నమోదు కూరగాయల సాగుపై తీవ్ర ప్రభావం చూపుతున్నాయి. కాతకు వచ్చిన పంటలపై భారీ వర్షం, వడగండ్లు పడటంతో పూర్తిగా దెబ్బతిన్నాయి. దీంతో దిగుబడి పూర్తిగా తగ్గిపోయింది. ప్రస్తుతం మార్కెట్కు రావాల్సిన కూరగాయల్లో సగం కూడా రాకపోవడంతో రోజురోజుకు డిమాండ్‌ పెరుగుతోంది. దీనికి తోడు శుభకార్యాలు అధికంగా ఉండటంతో కూరగాయల వినియోగం పెరిగింది. ధరలు పెరుగుతున్నా.. రైతుకు మాత్రం దిగబడి తగ్గడంతో పెట్టుబడులు మాత్రమే వచ్చే అవకాశం ఉందంటున్నారు. వినియోగదారులు మాత్రం మార్కెట్లో ఏదీ కొనాలన్నా వెనుకడుగు వేయాల్సి వస్తోందని రూ.500 వెచ్చించినా వారానికి సరిపడా కూరగాయలు రావడం లేదని వాపోతున్నారు. ఏ కూరగాయలు కొనాలన్నా కిలో రూ.60కి తక్కువ ఏవీ లేవంటున్నారు. అచ్చంపేట, నాగర్‌కర్నూల్‌, కొల్లాపూర్‌లోని అన్ని మార్కెట్లలో ధరలు పెరుగుతూనే ఉన్నాయి. మరో రెండు నెలల పాటు ఇదే పరిస్థితి ఉండనుందని వ్యాపారులు పేర్కొంటున్నారు.

వ్యాపారులకే లాభాలు..

కల్వకుర్తి వ్యవసాయ మార్కెట్ నుంచి నిత్యం వివిధ ప్రాంతాలకు కూరగాయలు సరఫరా జరుగుతుంటాయి. హైదరాబాద్‌, శ్రీశైలంతో పాటు వారాంతపు సంత ఉండే వివిధ ప్రాంతాలకు వాహనాల్లో వ్యాపారులు తరలిస్తుంటారు. నిత్యం టన్నుల కొద్దీ కూరగాయలు వస్తుండటంతో ప్రత్యేక ట్రేలలో నింపి ఇతర ప్రాంతాలకు సరఫరా చేస్తున్నారు. నియోజకవర్గంలో కూరగాయల సాగు విస్తీర్ణం పెరిగినప్పటికీ నెల రోజులుగా మార్కెట్కు వచ్చే సరకు తగ్గుతుండటం, డిమాండ్‌ పెరుగుతుండటంతో ధరలు రెండింతలయ్యాయి. సొరకాయ, మునగ, ఆకుకూరల ధరలు ఆకాశన్నంటుతున్నాయి. ధరల పెరుగుదలతో రైతులకు కొంతమేలవుతుండగా వ్యాపారులు అధిక లాభాలు పొందుతున్నారనే ఆరోపణలు ఉన్నాయి. రైతు నుంచి కిలో టమాట రూ.12 కొనుగోలు చేసే వ్యాపారులు వినియోగదారులకు కిలో రూ.20కి విక్రయిస్తున్నారు. ఇలా ప్రతి కూరగాయల్లో వ్యాపారులు అధిక ధరలకు విక్రయించి లాభాలు పొందుతున్నారు.