సాహితీవేత్త, విశ్రాంత ఉపాధ్యాయులు

డా.కండ్లకుంట అళహ సింగరాచార్యులు మృతి

అళహ సింగారాచార్యులు

ఎల్బీనగర్‌, న్యూస్‌టుడే: రచయిత, సాహితీవేత్త, విశ్రాంత ఉపాధ్యాయుడు డా.కండ్లకుంట అళహ సింగరాచార్యులు (93) ఆదివారం రాత్రి కన్నుమూశారు. మన్సూరాబాద్‌లో సౌత్‌ ఎండ్‌ పార్క్‌ కాలనీకి చెందిన ఆయన, కొద్ది రోజులుగా లంగర్‌హౌస్‌లోని కుమారుడి వద్ద ఉంటున్నారు. ఆదివారం రాత్రి అక్కడే మృతిచెందారు. స్వస్థలం నల్గొండ జిల్లా. ముగ్గురు కుమారులు, ఒక కుమార్తె ఉన్నారు. కుమారుల్లో ‘ఆంధ్రజ్యోతి’ దినపత్రిక సంపాదకులు కె.శ్రీనివాస్‌ ఒకరు. సింగరాచార్యుల ప్రసిద్ధ రచనల్లో ‘అధ్యాపకుడి ఆత్మకథ’ ఒకటి. సోమవారం ఉదయం మృతదేహాన్ని ఎల్బీనగర్‌లోని సౌత్‌ ఎండ్‌ పార్కు కాలనీకి తీసుకురానున్నారు. మధ్యాహ్నం 12 గంటలకు ఆటోనగర్‌ శ్మశాన వాటికలో అంత్యక్రియలు నిర్వహించనున్నట్లు బంధువులు తెలిపారు. సింగరాచార్యుల మృతికి తెలంగాణ సాహిత్య అకాడమీ ఛైర్మన్‌ జూలూరు గౌరీశంకర్‌ సంతాపం ప్రకటించారు.