వీడని వాన

కొనసాగుతున్న ద్రోణి

అన్నదాతల అష్టకష్టాలు

 దోమకొండలో పిడుగుపాటుకు దహనమవుతున్న తాటి చెట్టు

న్యూస్‌టుడే, కామారెడ్డి, నిజామాబాద్‌ వ్యవసాయం: ఉమ్మడి జిల్లాను అకాల వర్షాలు వీడటం లేదు. ఉపరితల ద్రోణి ప్రభావంతో వరుసగా కురుస్తున్న వానలు అన్నదాతలకు కునుకులేకుండా చేస్తున్నాయి. సోమవారం కూడా పలు ప్రాంతాల్లో భారీ ఈదురుగాలులతో వర్షం పడింది. అత్యధికంగా మాక్లూర్‌ మండలం మదన్‌పల్లిలో 18.5, పెద్దకొడప్‌గల్‌లో 18.0 మిల్లీ మీటర్ల వర్షపాతం నమోదైంది. బిచ్కుంద మండలం పుల్కల్‌లో 15.3, పిట్లంలో 9.0, పాత రాజంపేటలో 8.0, మచ్చర్లలో 6.3 మి.మీ. కురిసింది. దోమకొండ, పొతంగల్‌, నందిపేట్‌, నవీపేట, డొంకేశ్వర్‌, ఆలూర్‌, ఆర్మూర్‌, జక్రాన్‌పల్లి మండలాల్లో ఉరుములు, మెరుపులతో చినుకులు పడ్డాయి. ఒక్కసారిగా వచ్చిన చినుకులతో కల్లాలపై ఆరబెట్టిన ధాన్యం తడిసిపోయింది. కుప్పలు చేసుకొని తాటిపత్రులు కప్పే లోపే వర్షం బారినపడింది. ఈదురుగాలులకు చాలా చోట్ల చెట్లు విరిగిపడ్డాయి. పలు ప్రాంతాల్లో విద్యుత్తు సరఫరాకు అంతరాయం ఏర్పడింది. దోమకొండలో పిడుగుపాటుకు ఓ కొబ్బరిచెట్టు కాలిపోగా, నవీపేట మండలం మోకన్‌పల్లిలో ఆవు మృత్యువాత పడింది.