వైకాపాకు ఓట్లేయాలని చర్చిలో ప్రసంగం

కొండపిలోని చర్చిలో మాట్లాడుతున్న  వైకాపా నాయకుడు వెంకటేశ్వర్లు

ఈనాడు, ఒంగోలు: ఎన్నికల్లో ఎలాగైనా గెలుపొందాలనే లక్ష్యంతో వైకాపా నాయకులు ఎన్ని అడ్డదారులైనా తొక్కడానికి వెనుకాడడం లేదు. కొండపి మండలంలో ఆదివారం రాత్రి జరిగిన సంఘటనే ఇందుకు నిదర్శనం. మండలంలోని గోగినేనివారిపాలేనికి చెందిన చింతల ఎక్స్‌పోర్ట్స్‌ అధినేత, వైకాపా నాయకుడు చింతల వెంకటేశ్వర్లు తమ పార్టీని గెలిపించాలంటూ చర్చిలోనే ఏకంగా ఎన్నికల ప్రసంగం చేశారు. కొండపి బీసీ కాలనీతోపాటు మండలంలోని గోగినేనివారిపాలెం, కోయవారిపాలెంలలోని చర్చిల్లో ప్రార్థనలు ఏర్పాటు చేశారు. చీరలు పంపిణీ చేస్తామని చెప్పడంతో పలువురు మహిళలు హాజరయ్యారు. వెంకటేశ్వర్లు మాట్లాడుతూ.. భాజపాకు, దానికి మద్దతిస్తున్న తెదేపా, జనసేన పార్టీలను ఎన్నికల్లో ఓడించాలన్నారు. వైకాపా అభ్యర్థి ఆదిమూలపు సురేష్‌ను గెలిపించాలని కోరారు. అక్కడితో ఆగకుండా క్రైస్తవులతో వైకాపాకు ఓట్లు వేయిస్తే పాస్టర్లకు భారీ తాయిలాలు అందజేస్తామని కూడా చెప్పడం గమనార్హం.