అట్టడుగుకు రాజధాని

అత్యల్ప ఓటింగ్‌ శాతం నమోదు

చెన్నై, న్యూస్‌టుడే: చెన్నై జిల్లాలో కొన్ని చెదురుమదురు ఘటనలు మినహా శుక్రవారం పోలింగ్‌ ప్రశాంతంగా ముగిసింది. మిగతా నియోజకవర్గాలతో పోల్చితే రాజధాని చెన్నైలో పోలింగ్‌శాతం అట్టడుగుకు చేరింది. ఎన్నికల అధికారులు అవగాహన కార్యక్రమాలు నిర్వహించినా, ప్రచారాలు చేసినా పూర్తిస్థాయి ఫలితం కనిపించలేదు. కొన్నిచోట్ల ఈవీఎంలు మొరాయించడం, ఎండలు మండిపోవడం తదితర ఘటనలు కూడా పోలింగ్‌ శాతంపై ప్రభావం చూపించినట్టు ఓటర్లు చెబుతున్నారు. జిల్లాల్లోని ఉత్తర చెన్నై, మధ్య చెన్నై, దక్షిణ చెన్నై నియోజకవర్గాల్లో పోలింగ్‌ శాతం మందకొడిగానే ప్రారంభమైంది. ముగిసే సమయానికి ఉత్తర చెన్నైలో 69.26 శాతం, మధ్య చెన్నైలో 67.35, దక్షిణ చెన్నైలో 67.82 శాతం నమోదైంది. గత లోక్‌సభ ఎన్నికల్లో చెన్నై ఉత్తర నియోజకవర్గంలో 64.24, చెన్నై మధ్య నియోజకవర్గంలో 58.96, చెన్నై దక్షిణ నియోజకవర్గంలో 57.05శాతం పోలింగ్‌ నమోదైంది. చెన్నై ఉత్తర నియోజకవర్గం మినహాయించి మిగతా రెండు స్థానాల్లో పోలింగ్‌ శాతం పెరగడం గమనార్హం.మధ్య చెన్నై నియోజకవర్గంలోని స్టెల్లా మేరిస్‌ కళాశాల పోలింగ్‌ బూత్‌కు ఒకే కుటుంబానికి చెందిన 21 మంది సభ్యులు వచ్చారు. వారిలో ఓటర్లు 15 మంది ఉన్నారు.