సోలార్‌ బస్సు భళా..

నగరానికి చేరుకున్న ‘ఎనర్జీ స్వరాజ్‌ యాత్ర’

కొమ్మాది, న్యూస్‌టుడే: సోలార్‌ ప్రత్యేకతను దేశం నలుమూలలా చాటి చెప్పేందుకు మధ్యప్రదేశ్‌ ప్రాంతానికి చెందిన ఆచార్య చేతన్‌సింగ్‌ సోలంకి బస్సునే ఇల్లుగా మలిచి ‘ఎనర్జీ స్వరాజ్‌ యాత్ర (2020-30)’ చేపడుతున్నారు. ముంబాయి ఐఐటీలో ఆచార్యునిగా విధులు నిర్వర్తించిన చేతన్‌ సోలార్‌ పవర్‌ మీద పీహెచ్‌డీ చేసి దాని ప్రాముఖ్యతను దేశం నలుమూలలా చాటాలని ఇందుకు నడుం బిగించారు. ఆ యాత్ర బుధవారం నగరానికి చేరుకుంది. మధురవాడ గాయత్రీ విద్యాపరిషత్‌ ఇంజినీరింగ్‌ కళాశాలను సందర్శించగా సీఎఫ్‌ఎస్‌ఆర్‌ సోషల్‌ బాడీ నిర్వాహకులు యాత్ర ప్రతినిధులకు ఆహ్వానం పలికారు. ఆచార్య సోలంకి మాట్లాడుతూ ప్రతి ఇంట్లో సోలార్‌ విద్యుత్‌ సాయంతో పలు వస్తువులు ఏ విధంగా వాడుకోవచ్చో తెలిపేందుకే ఈ యాత్ర ఉద్దేశమన్నారు. ఈ విషయంలో తనకు మూడుసార్లు గిన్నిస్‌ బుక్‌ రికార్డులో చోటు లభించిందని పేర్కొన్నారు. తనకు బహుమతిగా లభించిన రూ.70లక్షలతో బస్సును కొనుగోలు చేసి, ఇల్లుగా మలిచి వసతులు సమకూర్చుకున్నట్లు పేర్కొన్నారు. ఈ విషయంలో మధ్యప్రదేశ్‌ ముఖ్యమంత్రి మెచ్చి తనకు భారత సోలార్‌ గాంధీ అని పేరు కూడా పెట్టారన్నారు. ఇప్పటి వరకు దక్షిణ భారతదేశంలో పదిరాష్ట్రాల పర్యటన పూర్తయిందన్నారు. అనంతరం దీనిపై ఇంజినీరింగ్‌ విద్యార్థులకు అవగాహన కల్పించారు. 

* ఈ బస్సుకు 8 సోలార్‌ ప్యానల్స్‌ అమర్చి సాధారణ వాతావరణంలో కూడా విద్యుదుత్పత్తి జరిగేలా రూపకల్పన చేశారు. దాదాపు 230 నుంచి 250 కిలోవాట్‌ల విద్యుత్తు రెండు మూడురోజుల వరకు సరిపడేలా ఈ ప్యానల్స్‌ ఉపయోగపడతాయి. ఈ బస్సులో మాదిరి ప్రజలంతా వారిళ్ల వద్ద సోలార్‌ పలకలను అమర్చుకుంటే 20 శాతం విద్యుత్తు ఆదా చేయవచ్చునని, ఈ విషయంలో తామంతా ఆచరించేందుకు సిద్ధమంటూ విద్యార్థులతో ప్రతిజ్ఞ చేయించారు. యాత్ర సభ్యులు ప్రశాంత్‌మిశ్రా, ఆంజనేయస్‌రాయ్, సిద్ధార్థ్‌ గవైలతో పాటు చేతన్‌ను గాయత్రీ కళాశాల యాజమాన్యం, సీఎఫ్‌ఎస్‌ఆర్‌ నిర్వాహకులు తదితరులు సత్కరించి సేవలను కొనియాడారు.