కాంగ్రెస్‌లోకి విశ్రాంత పోలీసు అధికారి నాగరాజు!

కొల్లాపూర్‌ బహిరంగ సభలో చేరికకు రంగం సిద్ధం

రంగంపేట, న్యూస్‌టుడే: వరంగల్‌ ఉమ్మడి జిల్లా ప్రజలకు సుపరిచితుడు, విశ్రాంత ఐపీఎస్‌ అధికారి కేఆర్‌.నాగరాజు కాంగ్రెస్‌లో చేరేందుకు రంగం సిద్ధమైంది. త్వరలో కొల్లాపూర్‌లో జరిగే బహిరంగ సభలో పార్టీలో చేరుతానని ఆయన ‘న్యూస్‌టుడే’కు తెలిపారు. గురువారం దిల్లీలో తెలంగాణ రాష్ట్ర వ్యవహారాల ఇన్‌ఛార్జి మాణిక్‌రావు ఠాక్రే, టీపీసీసీ అధ్యక్షుడు రేవంత్‌రెడ్డి, సీఎల్పీ నాయకుడు భట్టి విక్రమార్కను కలిశారు. వాస్తవంగా దిల్లీలోనే చేరేందుకు వెళ్లగా.. కోల్లాపూర్‌ బహిరంగ సభలోనే కాంగ్రెస్‌ కండువా కప్పుకోవాలని టీపీసీసీ అధ్యక్షుడు రేవంత్‌రెడ్డి సూచించినట్లు తెలిసింది. మరోవైపు నాగరాజు శుక్రవారం రాత్రి హనుమకొండలో వరంగల్‌ జిల్లా కాంగ్రెస్‌ అధ్యక్షురాలు ఎర్రబెల్లి స్వర్ణ, సీనియర్‌ నాయకుడు వరదరాజేశ్వర్‌రావును మర్యాద పూర్వకంగా కలిశారు. వచ్చే శాసనసభ ఎన్నికల్లో వర్ధన్నపేట నుంచి పోటీ చేయాలని ఆయన భావిస్తున్నట్లుగా తెలిసింది. ఇందులో భాగంగా శనివారం ఉదయం వర్ధన్నపేట పట్టణంలో నియోజకవర్గ ముఖ్య నాయకులు, కార్యకర్తలు, అభిమానులతో సమావేశం కానున్నారు.