జడ్‌హెచ్‌డీసీ భూములపై అక్రమార్కుల కన్ను

భాగ్యనగరం వద్ద చదును చేసిన ప్రాంతం

మైదుకూరు, న్యూస్‌టుడే: మైదుకూరు మండలం నంద్యాలంపేట రెవెన్యూ పొలంలో జిల్లా హరిజనాభివృద్ధి సంస్థ (జడ్‌హెచ్‌డీసీ) భూములపై కొందరి కన్ను పడింది. భాగ్యనగరం సమీపంలో కమలాపురానికి చెందిన వ్యక్తి ఒకరు ఖాజీపేట-తువ్వపల్లె కూడలి రహదారి పక్కనే దాదాపు ఐదెకరాల మేర భూమిని డోజరుతో చదును చేయించే పనిలో నిమగ్నమయ్యారు. నంద్యాలంపేట, వరదాయపల్లె, గాంధీనగర్, కొత్త గంగవరం, భాగ్యనగరం ప్రాంతంలో 441.86 ఎకరాల్లో జడ్‌హెచ్‌డీసీ భూములు ఉన్నాయి. గతంలో ఈ భూములును కొందరు ఎస్సీలకు లీజు ప్రాతిపదికన కేటాయించారు. లీజు గడువు ముగిసిపోవడంతో భాగ్యనగరం సమీపంలోని భూములు బీడుగా ఉన్నాయి. ఇప్పటికే కొందరు భూముల కోసం జడ్‌హెచ్‌డీసీ అధికారులకు దరఖాస్తు చేసుకున్నట్లు తెలిసింది. ఈ ప్రక్రియ ఒకవైపు సాగుతుండగా కమలాపురం వాసి ఒకరు రెండ్రోజులుగా డోజర్‌తో పనులు చేపట్టడం స్థానికంగా చర్చనీయాంశమైంది. ఈ విషయమై తహసీల్దారు ప్రేమంతకుమార్‌ మాట్లాడుతూ జడ్‌హెచ్‌డీసీ భూములను ఎవరికీ లీజుకు ఇవ్వలేదని వెంటనే చర్యలు తీసుకుంటామని స్పష్టం చేశారు. తనిఖీకి వెళ్లిన వీఆర్వో వెంకటసుబ్బయ్యను చూసిన ఆక్రమణదారుడు ఆ ప్రాంతం నుంచి పారిపోయినట్లు పేర్కొన్నారు. భూముల ఆక్రమణకు పాల్పడితే కఠిన చర్యలు తీసుకుంటామని హెచ్చరించారు.