Medaram: జాతీయ పండుగ విధానం ఎక్కడా లేదు: కిషన్‌రెడ్డి

ములుగు: మేడారం జాతరను జాతీయ పండుగగా నిర్వహించాలని చాలా మంది అడుగుతున్నారని, కానీ.. జాతీయ పండుగ అనే విధానం ఎక్కడా లేదని కేంద్రమంత్రి కిషన్‌రెడ్డి స్పష్టం చేశారు. మేడారంపై కేంద్ర ప్రభుత్వానికి ఎలాంటి వివక్ష లేదని, ఈ జాతరకి అంతర్జాతీయ గుర్తింపు కోసం ప్రయత్నిస్తామని చెప్పారు. గురువారం ఆయన మేడారంలో సారలమ్మను దర్శించుకొని నిలువెత్తు బంగారం సమర్పించారు. అనంతరం ఆయన మీడియాతో మాట్లాడుతూ.. ములుగులో గిరిజన వర్సిటీ తాత్కాలిక క్యాంపస్‌ను ఏర్పాటు చేస్తామని, ఈ ఏడాదే ప్రవేశాలకు అనుమతిస్తామని వెల్లడించారు. ఎక్కువ సీట్లు తెలంగాణ విద్యార్థులకే ఇస్తామన్నారు. వర్సిటీ భవనాలకు ప్రధాని మోదీ శంకుస్థాపన చేస్తారని చెప్పారు.