తవ్వకాల్లో బయల్పడిన 505 బంగారు నాణేలు

తిరుచిరాపల్లి (తమిళనాడు): తమిళనాడులోని ఓ దేవాలయం పరిసరాల్లో జరిగిన తవ్వకాల్లో 1.716 కిలోల బరువున్న 505 బంగారు నాణెములు లభించాయి. ఇక్కడి తిరువనైకావల్‌లో ఉన్న జంబుకేశ్వరర్‌ దేవాలయంలో బుధవారం ఈ సంపద బయటపడింది. దొరికిన సంపదలో 504 నాణాలు చిన్నవి కాగా, ఒకటి పెద్దదని ఆలయ అధికారులు తెలిపారు. వీటిని క్రీ.శ. 1000 నుంచి 1200 కు చెందినవిగా భావిస్తున్నారు. దేవాలయం పరిసరాల్లో తవ్వకాలు జరుపుతుండగా ఏడు అడుగుల లోతులో ఓ మట్టి పాత్రలో ఈ నాణెములు లభించాయి. పాత్రతో సహా బంగారు నాణెములను పోలీసులకు అప్పగించినట్టు దేవాదాయ శాఖ అధికారులు తెలిపారు. అనంతరం వీటిని ప్రభుత్వ ట్రెజరీకి తరలించారు.