హైదరాబాద్ ఓటర్ల కోసం ‘పోల్‌ క్యూ రూట్’ పోర్టల్‌

హైదరాబాద్‌: తెలంగాణ అసెంబ్లీ ఎన్నికల (Telangana Elections 2023) సందర్భంగా పోలింగ్‌ కేంద్రాల వద్ద ఓటు వేసే క్యూ లైన్‌ వివరాలు తెలుసుకునేందుకు హైదరాబాద్‌ జిల్లా ఎన్నికల అధికారి రోనాల్డ్‌ రోస్‌ వినూత్న చర్యలు చేపట్టారు. ఇందుకోసం ఆయన ‘పోల్‌ క్యూ రూట్‌’ అనే ప్రత్యేక పోర్టల్‌ను ఓటర్లకు అందుబాటులోకి తెచ్చారు. ప్రతి ఒక్కరూ ఓటు వేయాలనే ఉద్దేశంతో ఈ పోర్టల్‌ను తీసుకొచ్చినట్లు రోనాల్డ్‌ రోస్‌ తెలిపారు. జీహెచ్‌ఎంసీ వెబ్‌సైట్‌, యాప్‌ ద్వారా ఈ పోర్టల్‌ సేవలు పొందొచ్చు. జీహెచ్‌ఎంసీ వెబ్‌సైట్‌ లేదా యాప్‌ ఓపెన్‌ చేసి అందులో పోల్‌ క్యూ లైన్‌ పోర్టల్‌ సెలెక్ట్ చేయాలి. తర్వాత నియోకవర్గం, పోలింగ్ స్టేషన్‌ను వివరాలను నమోదు చేసి కింద ఉన్న సెర్చ్‌ ఆప్షన్‌పై క్లిక్ చేస్తే..లైన్‌లో వేచి ఉండాల్సిన సమయాన్ని చూపిస్తుంది. ఈ వివరాలను సంబంధిత అధికారి ఎప్పటికప్పుడు అప్‌డేట్ చేస్తారని రోనాల్డ్‌ రోస్‌ తెలిపారు. హైదరాబాద్ జిల్లా పరిధిలోని ఓటర్లకు మాత్రమే ఈ పోర్టల్‌ సేవలు అందుబాటులో ఉంటాయి.