Tarakaratna: తారకరత్నను విదేశాలకు తీసుకెళ్లే యోచనలో కుటుంబ సభ్యులు: లక్ష్మీనారాయణ

బెంగళూరు: బెంగళూరులోని నారాయణ హృదయాలయ(Narayana Hrudayalaya) ఆసుపత్రిలో తెలుగు సినీనటుడు తారకరత్న(Tarakaratna)కు చికిత్స కొనసాగుతోంది. శుక్రవారం తెదేపా హిందూపురం పార్లమెంట్‌ కార్యదర్శి అంబికా లక్ష్మీనారాయణ ఆసుపత్రికి చేరుకుని తారకరత్న ఆరోగ్యంపై కుటుంబ సభ్యులను అడిగి తెలుసుకున్నారు. అనంతరం ఆయన మీడియాతో మాట్లాడుతూ... ‘‘ఇవాళ తారకరత్న మెదడు స్కానింగ్‌ తీశారు. వచ్చే నివేదిక ఆధారంగా మెదడు పనితీరు తెలుస్తుంది. పరిస్థితిని బట్టి విదేశాలకు తీసుకెళ్లే యోచనలో కుటుంబ సభ్యులు ఉన్నారు. తారకరత్నను బాలకృష్ణ దగ్గరుండి చూసుకుంటున్నారు’’ అని లక్ష్మీనారాయణ తెలిపారు. తారకరత్న తండ్రి మోహనకృష్ణ, భార్య అలేఖ్య, పలువురు కుటుంబ సభ్యులు ఆసుపత్రిలోనే ఉన్నారు.

నందమూరి తారకరత్న సంపూర్ణ ఆరోగ్యంతో త్వరగా కోలుకోవాలని హిందూపురానికి చెందిన తెదేపా నాయకులు, కార్యకర్తలు పూజలు నిర్వహించారు. బెంగళూరులోని నారాయణ హృదయాలయ ఆసుపత్రిలోని వినాయకస్వామి ఆలయంలో ప్రత్యేక పూజలు చేశారు. తారకరత్న కోలుకోవాలని ప్రార్థిస్తూ 101 కొబ్బరికాయలు కొట్టారు.