Hyderabad: తెలంగాణ రాష్ట్ర అవతరణ పదేళ్ల పండుగ సంబురాలకు సర్వం సిద్ధం

హైదరాబాద్‌: తెలంగాణ రాష్ట్ర అవతరణ పదేళ్ల పండుగ సంబరాలకు సర్వం సిద్ధమైంది. కాంగ్రెస్‌ అధికారంలోకి వచ్చిన తర్వాత తొలిసారి జరుగుతున్న రాష్ట్ర అవతరణ వేడుకలకు ప్రభుత్వం ఘనంగా ఏర్పాట్లు చేసింది. ఉదయం పరేడ్‌ గ్రౌండ్స్‌లో ఉత్సవాలు.. సాయంత్రం ట్యాంక్‌బండ్‌పై సంబరాలు జరగనున్నాయి. ఆదివారం ఉదయం 9.15 గంటలకు గన్ పార్కులోని అమరవీరుల స్తూపం వద్ద అమరులకు ముఖ్యమంత్రి రేవంత్‌ రెడ్డి నివాళి అర్పించనున్నారు. అక్కడి నుంచి సికింద్రాబాద్ పరేడ్ గ్రౌండ్‌కు చేరుకుంటారు. ఉదయం 10 గంటలకు జాతీయ జెండాను సీఎం ఆవిష్కరించడంతో ఉత్సవాలు ప్రారంభమవుతాయి.

అనంతరం సీఎం గౌరవ వందనం స్వీకరిస్తారు. ఆ తర్వాత రాష్ట్ర అధికార గీతం ‘జయ జయహే తెలంగాణ’ను ఆవిష్కరించి.. రేవంత్ రెడ్డి ప్రసంగిస్తారు. రాష్ట్ర చరిత్ర, సాంస్కృతిక పునరుజ్జీవనానికి సంబంధించిన కీలక నిర్ణయాలు ప్రకటించే అవకాశం ఉంది. ఆ తర్వాత పోలీసు సిబ్బందికి, ఉత్తమ శకటాలకు అవార్డులు ప్రదానం చేస్తారు.