Amit Shah: ‘జమాతే ఇస్లామీ’పై నిషేధం పొడిగింపు

దిల్లీ: ‘జమాతే ఇస్లామీ- జమ్మూకశ్మీర్‌ (JIJK)’ సంస్థపై నిషేధాన్ని కేంద్రం మరో ఐదేళ్లపాటు పొడిగించింది. కేంద్ర హోంశాఖ మంత్రి అమిత్‌ షా (Amit Shah) మంగళవారం ఈ మేరకు ట్వీట్‌ చేశారు. ఉగ్రవాదం, వేర్పాటువాదానికి వ్యతిరేకంగా ప్రధాని నరేంద్ర మోదీ ‘జీరో టాలరెన్స్’ విధానాన్ని అనుసరిస్తూ.. ఈ నిర్ణయం తీసుకున్నట్లు వెల్లడించారు. దేశ భద్రత, సమగ్రత, సార్వభౌమాధికారానికి వ్యతిరేకంగా ఈ సంస్థ తన కార్యకలాపాలను కొనసాగిస్తున్నట్లు గుర్తించామని తెలిపారు. దేశ భద్రతకు ముప్పుగా పరిణమించేవారిపై కఠిన చర్యలు తీసుకుంటామని హెచ్చరించారు.

దేశంలోనే వృద్ధ ఎంపీ షఫికర్‌ రహ్మాన్‌ బర్క్‌ కన్నుమూత

జమాతే ఇస్లామీ.. జమ్మూ- కశ్మీర్‌లో అతిపెద్ద రాజకీయ, మతపరమైన సంస్థ. దీనికి పాఠశాలలు, ఇతర సామాజిక మౌలిక సదుపాయాలతో కూడిన భారీ నెట్‌వర్క్‌ ఉండేది. అయితే, ఈ సంస్థ ఉగ్రవాదానికి మద్దతు ఇస్తోందని ఆరోపణలు ఉన్నాయి. 1990ల్లో కశ్మీర్‌లో ఉగ్రవాద సంస్థ అయిన ‘హిజ్బుల్ ముజాహిదీన్‌’కు సైద్ధాంతిక మార్గదర్శిగా దీనికి పేరుంది. ఈ క్రమంలోనే.. 2019 ఫిబ్రవరి 28న కేంద్రం దీన్ని చట్టవిరుద్ధమైన సంస్థగా ప్రకటించి నిషేధించింది. ఈ సంస్థ కార్యకలాపాలపై ఉక్కుపాదం మోపిన కేంద్రం.. జమ్మూ-కశ్మీర్‌లోని రూ.వందల కోట్ల విలువైన ఆస్తుల్ని జప్తు చేసింది.