Satya Pal Malik: సత్యపాల్‌ మాలిక్ నివాసంలో సీబీఐ సోదాలు

శ్రీనగర్‌: జమ్మూకశ్మీర్ మాజీ గవర్నర్ సత్యపాల్‌ మాలిక్‌(Satya Pal Malik)కు నివాసంలో సీబీఐ సోదాలు చేపట్టింది. కిరు హైడ్రో ఎలక్ట్రిక్ ప్రాజెక్టుకు చెందిన అవినీతి కేసులో భాగంగా ఈ తనిఖీలు నిర్వహిస్తోంది. ఈ కేసు దర్యాప్తులో భాగంగా 30 ప్రాంతాల్లో ఈ దాడులు నిర్వహించినట్టు సమాచారం.

2,200 కోట్ల విలువైన కిరు హైడ్రో ఎలక్ట్రిక్ పవర్ ప్రాజెక్ట్ (హెచ్‌ఇపి)లో పనులు కేటాయింపులో అవినీతి జరిగిందని  ఆరోపణలు వచ్చాయి. దాంతో ఏప్రిల్‌ 2022లో మాలిక్‌తో సహా ఐదుగురు వ్యక్తులపై సీబీఐ కేసు నమోదు చేసింది. ఆ దర్యాప్తులో భాగంగా గురువారం ఉదయం 100 మంది అధికారులు పలు నగరాల్లో ఈ సోదాలు ప్రారంభించారని సంబంధిత అధికారులు వెల్లడించారు. మాలిక్‌.. 2018 ఆగస్టు నుంచి 2019 అక్టోబర్ వరకు జమ్మూకశ్మీర్ గవర్నర్‌గా విధులు నిర్వర్తించారు. ఆ సమయంలో తన వద్దకు రెండు దస్త్రాలు వచ్చాయని, వాటిపై సంతకం చేస్తే రూ.300 కోట్లు వస్తాయని తన కార్యదర్శులు చెప్పినట్లు గతంలో సంచలన వ్యాఖ్యలు చేశారు. అందులో ఒక దస్త్రం హైడ్రో ప్రాజెక్టుదని తెలిపారు. 

ఈ సోదాల సందర్భంగా ఆయన ఎక్స్‌ వేదికగా  స్పందించారు. తాను కొద్దిరోజులుగా అనారోగ్యంతో ఆసుపత్రిలో చికిత్స పొందుతున్నట్లు చెప్పారు. ‘నేను అనారోగ్యంతో ఉన్నప్పటికీ.. నా నివాసంపై నిరంకుశ శక్తులు దాడి చేస్తున్నాయి. ఈ సోదాల ద్వారా నా డ్రైవర్‌, సహాయకుడిని వేధిస్తున్నాయి. ఇలాంటి వాటికి నేను భయపడను. నేను రైతులకు అండగా నిలుస్తాను’ అని వెల్లడించారు. గతంలో  ఓ బీమా పథకం ఒప్పందానికి చెందిన అవినీతి  కేసులో సీబీఐ.. మాలిక్‌ను సాక్షిగా 5 గంటల పాటు విచారించింది.