Kejriwal: స్వాతి మాలీవాల్‌పై దాడి ఘటన.. తొలిసారి స్పందించిన కేజ్రీవాల్‌

దిల్లీ: ఆమ్‌ ఆద్మీ పార్టీ (AAP) రాజ్యసభ సభ్యురాలు స్వాతి మాలీవాల్‌ (Swati Maliwal)పై దిల్లీ ముఖ్యమంత్రి అరవింద్‌ కేజ్రీవాల్‌ (Arvind Kejriwal) వ్యక్తిగత సహాయకుడు బిభవ్‌కుమార్‌ దాడి చేసిన ఘటన ఇటీవల తీవ్ర చర్చనీయాంశమైన సంగతి తెలిసిందే. ఈ ఘటనపై కేజ్రీవాల్‌ బుధవారం తొలిసారి స్పందించారు. ఈ ఘటనపై సమగ్ర విచారణ జరగడంతో పాటు ఆమెకు న్యాయం అందుతుందని ఆశాభావం వ్యక్తంచేశారు.

‘‘ఈ ఘటనపై సమగ్ర విచారణ జరుగుతుందని ఆశిస్తున్నా. న్యాయం జరగాలి. ఈ కేసులో రెండు కోణాలు ఉన్నాయి. ఇద్దరి నుంచి నిష్పక్షపాతంగా విచారణ జరిపినప్పుడే సరైన న్యాయం అందుతుంది. ప్రస్తుతం ఈ అంశం న్యాయస్థానం పరిధిలో ఉన్నందున.. ఏమీ మాట్లాడలేను’’ అని పీటీఐ వార్త సంస్థకు ఇచ్చిన ఇంటర్వ్యూలో కేజ్రీవాల్‌ పేర్కొన్నారు.

నా వ్యక్తిగత ఫొటోలు లీక్‌ చేసేందుకు కుట్రలు: స్వాతి మాలీవాల్‌ సంచలన ఆరోపణలు

సీఎం కేజ్రీవాల్‌ నివాసంలోని డ్రాయింగ్‌ రూంలో ఎదురుచూస్తున్న స్వాతితో.. బిభవ్‌కుమార్ అమర్యాదగా ప్రవర్తించి, దాడి చేసినట్లు ఆరోపణలు వచ్చిన విషయం తెలిసిందే. ఈ కేసులో బిభవ్‌ను అరెస్టు చేసిన దిల్లీ పోలీసులు నిందితుడిని ముంబయికి తీసుకెళ్లారు. స్వాధీనం చేసుకున్న నిందితుడి ఫోన్లు, ల్యాప్‌టాప్‌లు, సీసీటీవీ రికార్డులను ఫోరెన్సిక్‌ పరీక్షలకు పంపించారు. ఈ క్రమంలోనే తన వ్యక్తిగత ఫొటోలు లీక్‌ చేసేందుకు కుట్రలు జరుగుతున్నాయని స్వాతి మాలీవాల్‌ సోషల్‌ మీడియా వేదికగా ఆందోళన వ్యక్తంచేశారు. ఈ పరిణామాల నేపథ్యంలో కేజ్రీవాల్‌ ఇలా స్పందించారు.