నదిలో దూకి ముగ్గురిని కాపాడిన గోవా బాలుడు

గోవాలో పదేళ్ల బాలుడు నదిలో మునిగిపోతున్న ముగ్గురు మిత్రులను తన ప్రాణాలను పణంగా పెట్టి మరీ కాపాడి ఔరా అనిపించాడు. రాష్ట్ర రాజధాని పణజీ నుంచి 15 కిలోమీటర్ల దూరంలో ఉన్న కుంబార్జువాలో గ్రామదేవత ఉత్సవాలు జరుగుతున్న సందర్భంగా స్నేహితులు నలుగురూ అక్కడికి వెళ్లారు. రంగులు చల్లుకొని ఆడుకున్నారు. అనంతరం శుభ్రం చేసుకునేందుకు దగ్గర్లోని నది వద్దకు వెళ్లారు. వారిలో ముగ్గురు పిల్లలు ప్రమాదవశాత్తూ జారి నీటిలో పడిపోయారు. ఈత రాకపోవడంతో ప్రాణభయంతో కేకలు వేశారు. మిత్రుల పరిస్థితిని గమనించిన సంజయ్‌ వెంటనే అప్రమత్తమై నీటిలోకి దూకాడు. ఒకరి తరవాత మరొకరుగా ముగ్గురినీ ఒడ్డుకు చేర్చాడు. స్థానికుల సాయంతో అంబులెన్సుకు ఫోను చేశాడు. సీపీఆర్‌ చేయడంతో ఆ ముగ్గురూ తేరుకున్నారు. సమయస్ఫూర్తి, ధైర్యసాహసాలు కనబరిచి ముగ్గురి ప్రాణాలు కాపాడిన సంజయ్‌ పేరు గోవా అంతటా మార్మోగింది. శుక్రవారం ముఖ్యమంత్రి ప్రమోద్‌ సావంత్‌ ఈ సాహస బాలుడికి రూ.లక్ష బహుమతిని అందించి అభినందించారు.