200 గంటలు.. 300 సమావేశాలు.. 15 ముసాయిదాలు..

దిల్లీ డిక్లరేషన్‌ వెనుక భారీ కసరత్తు
జీ 20 భారత ప్రతినిధి అమితాబ్‌ కాంత్‌

దిల్లీ: జీ20 శిఖరాగ్ర సదస్సులో నేతల మధ్య దిల్లీ డిక్లరేషన్‌పై ఏకాభిప్రాయం సాధించడానికి మన దౌత్యవేత్తల బృందం విశేష కృషి చేసినట్లు జీ20 భారత దేశ ప్రతినిధి(షెర్పా) అమితాబ్‌ కాంత్‌ తెలిపారు. దాదాపు 200 గంటల పాటు నిరంతర చర్చలు జరిపినట్లు ఆయన వెల్లడించారు. అదనపు కార్యదర్శులైన ఈనం గంభీర్‌, కె.నాగరాజు నాయుడితో కూడిన దౌత్యవేత్తల బృందం 300 ద్వైపాక్షిక సమావేశాలను నిర్వహించినట్లు పేర్కొన్నారు. వివాదాస్పద ఉక్రెయిన్‌ అంశంపై ఇతర దేశాల్లోని తమ సహచరులతో 15 ముసాయిదాలను పంచుకున్నట్లు వివరించారు. వీరందరి కృషి వల్లే జీ20 సదస్సు తొలిరోజే నేతల మధ్య ఏకాభిప్రాయం సాధ్యమైందన్నారు. ‘‘మొత్తం జీ20 సదస్సులో అత్యంత సంక్లిష్టమైన భాగం భౌగోళిక రాజకీయాలపై (రష్యా-ఉక్రెయిన్‌) ఏకాభిప్రాయం తీసుకురావడం. ఇది 200 గంటల పాటు నిరంతర చర్చలు, 300 ద్వైపాక్షిక సమావేశాలు, 15 ముసాయిదాల వల్లే సాధ్యమైంది. నాగరాజు నాయుడు, గంభీర్‌ ఈ విషయంలో ఎంతో సహకరించారు’’ అని అమితాబ్‌ కాంత్‌ పేర్కొన్నారు.