అధికారితోనే పంట వ్యర్థాలు దగ్ధం చేయించిన రైతులు

పంజాబ్‌లో ఘటన

చండీగఢ్‌: దిల్లీ సహా పరిసర ప్రాంతాల్లో వాయు కాలుష్యం తీవ్రంగా పెరిగింది. పంజాబ్‌, హరియాణా ప్రాంతాల్లోని రైతులు పంట వ్యర్థాలను తగులబెట్టడం ఈ పరిస్థితికి కారణమైంది. దీంతో పంజాబ్‌లో పంట వ్యర్థాలను తగులబెట్టకుండా ఆప్‌ సర్కారు చర్యలు చేపట్టింది. ఈ క్రమంలో బఠిండాలో కొందరు రైతులు పంట వ్యర్థాలకు నిప్పు పెట్టకుండా అడ్డుకున్న ప్రభుత్వ అధికారితోనే బలవంతంగా దగ్ధం చేయించడం సంచలనంగా మారింది. దీనికి సంబంధించిన వీడియో సామాజిక మాధ్యమాల్లో వైరల్‌గా మారింది. ఈ వీడియోను పంజాబ్‌ సీఎం భగవంత్‌ మాన్‌ ఎక్స్‌లో షేర్‌ చేస్తూ.. రైతుల చర్యపై ఆగ్రహం వ్యక్తం చేశారు. శనివారం ప్రభుత్వ అధికారి హర్‌ప్రీత్‌ సింగ్‌.. బఠిండా సమీపంలోని మెహమా సర్జా గ్రామంలో పంట వ్యర్థాలను తగులపెట్టకుండా ఉండేలా అన్నదాతలను ఒప్పించేందుకు వెళ్లారు. ఆ సమయంలో అక్కడికి చేరుకున్న రైతు సంఘాల నేతలు హర్‌ప్రీత్‌ను చుట్టుముట్టి ఆయనతోనే పంట వ్యర్థాలకు నిప్పు పెట్టించారని బఠిండా ఎస్పీ గుల్‌నీత్‌ సింగ్‌ ఖురానా తెలిపారు. ఈ ఘటనకు బాధ్యులైన ఏడుగురిపై కేసు నమోదు చేసినట్లు వెల్లడించారు.