Justice Madan B Lokur: నెలల తరబడి జైళ్లలో ఉంచడం అత్యంత దురదృష్టకరం

బెయిల్‌ మూల సిద్ధాంతాల్ని కోర్టులు మరిచిపోతున్నాయి
దర్యాప్తు సంస్థల దుర్బుద్ధిని గుర్తించడం లేదు
పీటీఐ ఇంటర్వ్యూలో సుప్రీంకోర్టు విశ్రాంత న్యాయమూర్తి జస్టిస్‌ మదన్‌ బి లోకుర్‌ వ్యాఖ్యలు

దిల్లీ: బెయిల్‌ మంజూరు, లేదా తిరస్కరణపై మూల సిద్ధాంతాలను న్యాయస్థానాలు మరిచిపోతున్నట్లున్నాయని సుప్రీంకోర్టు విశ్రాంత న్యాయమూర్తి జస్టిస్‌ మదన్‌ బి లోకుర్‌(Justice Madan B Lokur) అభిప్రాయపడ్డారు. నిందితులను కారాగారంలో ఉంచాలనే ఉద్దేశంతో దర్యాప్తు సంస్థలు చేసే ప్రయత్నాలను గుర్తించేందుకు న్యాయవ్యవస్థ సుముఖంగా లేకపోవడం ‘అత్యంత దురదృష్టకరం’ అని అన్నారు. పీటీఐ వార్తాసంస్థకు ఇచ్చిన ఈ-మెయిల్‌ ఇంటర్వ్యూలో ఆయన పలు వ్యాఖ్యలు చేశారు. దిల్లీలో ఆప్‌ నేత మనీశ్‌ సిసోదియాకు న్యాయస్థానం బెయిల్‌ నిరాకరించడంపై ఆయన ఈ మేరకు స్పందించారు. ప్రస్తుత రోజుల్లో ఒక వ్యక్తి అరెస్టయితే కనీసం కొన్ని నెలలపాటు జైల్లో ఉండాల్సి రావడం ఖాయమని అన్నారు.

‘పోలీసులు మొదట ఒక వ్యక్తిని అరెస్టు చేస్తారు. ఆ తర్వాత సీరియస్‌గా దర్యాప్తు మొదలుపెడతారు. దర్యాప్తు సంస్థలు అరకొర వివరాలతో ఛార్జిషీటు వేసి, తర్వాత అనుబంధ ఛార్జిషీటు దాఖలు చేస్తాయి. ఈ కోణాన్ని కొన్ని కోర్టులు చూడడం లేదు. న్యాయశాస్త్ర పుస్తకాలు ఇలాంటి మొత్తం కథను చెప్పవు. ఈ సత్యాలను న్యాయవ్యవస్థ గుర్తెరగాలి’ అని జస్టిస్‌ లోకుర్‌ చెప్పారు. కేంద్ర-రాష్ట్ర ప్రభుత్వాలు తమ దర్యాప్తు సంస్థల్ని దుర్వినియోగం చేస్తున్నట్లు విమర్శలు వస్తున్న నేపథ్యంలో ఎలాంటి వైఖరి అనుసరించాలనే ప్రశ్నకు సమాధానంగా ఆయన ఈ వ్యాఖ్యలు చేశారు. బెయిల్‌ విషయాల్లో విచక్షణాధికారాలను ఎలా వినియోగించుకోవాలనే ప్రాథమిక సూత్రాలను నిర్దేశిస్తూ సుప్రీంకోర్టు గతంలో పలు తీర్పులు వెలువరించిందని గుర్తుచేశారు. ఈ విషయం తెలిసినా కొన్ని కోర్టులు వాటిని పాటించడం లేదని, అది ఎందుకనేదే ప్రశ్న అని అన్నారు.